CPP/NPA lakma na - 9th ID

Apektado na an organisasyon kan Communist Party of the Philippines/New People’s Army (CPP/NPA) sa Kabikolan sagcod na pilay na an saindang operasyon huli kan mga nagsusurokong suportadores, regular na armadong rebeldeng NPA asin nagagadan sa mga encuentro sa soldados kan 9th Infantry Division kan Philippine Army sa Bicol.


Iyan an mga pahayag ni Army Capt. John Paul Belleza, opisyal na parataram kan 9th ID na may base sa Camp Elias Angeles, San Jose, Pili, Camarines Sur.


Dawa na ngani igwa pang natatadang sadit na grupo alagad lakma na an saindang organisasyon asin nawawaran pang mga dekalibreng armas matapos isuko sa soldados kan gobierno.


Sa saindang datus, segun ki Belleza sobra na sa 1,000 na communist terrorist group (CTGs) asin labi na sa sangatos (100) regular na miembros asin maabot man sa sangatos na mga nakumfiscar asin sinukong mga armas.


Kan nagtalikod na taon 2020 maabot sa 500 na CTGs an nagsuruko sa soldados kan 9th ID sa Masbate, ngunian na taon igwa pang mga hale sa Sorsogon, Albay, Camarines Sur, Catanduanes asin Camarines Norte, sabi pa kan 9th ID.

Mga sinuko asin nakumfiscar na mga armas kan soldados kan 9th ID sa rebeldeng NPA. (Capt. J.P. Belleza)


An CTGs bako lang miembros kan NPA alagad kabale na digdi si mga kumunista, National Democratic Front, mass organization sa mga comunidad siring kan Sanggay ng Partido sa Localidad.


Pasalamat an 9th ID sa Bicol na dakulang bagay an kooperasyon kan mga residentes sa barangay sa pagtabang contra sa ano man na operasyon kan rebeldeng grupo.


An NPA nagdadanay sa Filipinas sa laog na nin labi sa 50 taon asin admitido kan 9th ID na mayo pa sindang madeclarang ‘‘insurgency free’’ alagad kadaklan mga nasa klasifikasyon bilang ‘‘manageable’’.


An pagcrear ni Presidente Rodrigo Duterte kan National Task Force to End Local Communist o NTF-ELCAC nakakatabang sa kampanya kan gobierno laban sa insurhencia.


Sa paagi kan NTF-ELCAC, an gobierno igwang programa kan Enhanced Comprehensive Local Integration Program (E-CLIP) sa mga dating kumunistang rebelde nganing tabangan sinda na makabalik sa normal na pagbuhay sagcod na maging produktibo sa saindang mga comunidad.