CPP/NPA natagalpo kan estratehiya sa eleksyon

Dai hinahale an posibilidad kan 9th Infantry Division kan Philippine Army sa Bicol na may base sa Camp Elias Angeles, San Jose, Pili, Camarines Sur na naghihimo na nin estratihiya an Communist Party of the Philipppines/New People’s Army (CPP/NPA) para sa maabot na eleksyon lokal asin nasyonal sa Mayo 2022 sa saindang amay na operasyon alagad inabotan kan soldados kan gobierno sagcod nagkakaigwa nin encuentro.

Kabale sa posibleng mga plano iyo an pag-imponer nin ‘‘permit to campaign-permit to win’’ na cada eleksyon saindang ginigibo alagad an nangyaring bakbakan na-ulang an saindang mga plano para sa maabot na eleksyon.

Si Army Major John Belleza, opisyal na parataram kan 9th ID nagpahayag huli kan cooperasyon kan sibilyan sa mga barangay pigsusumbong an saindang mga operasyon sagcod na sinasakyada kan militar an grupo kan rebelde na dagos nang nagkakaigwa nin encuentro.

Mga de calibreng armas asin propaganda materials kan CPP/NPA nabawi kan mga soldados kan 9th ID sa mga magkasuhay na operasyon sa Masbate, Camarines Sur asin Sorsogon. (Retrato kan 9th ID)

Ini nangyari sa Masbate na nagresulta sa pagkakagadan kan apat na communist NPA terrorists (CNTs) mantang mayong nalugadan sa lado kan mga soldados kan gobierno.

Kan Deciembre 17 alas 5:50 nin aga an mga elementos kan 2nd Infantry Battalion sa irarum kan 903rd Infantry Brigade kaibanan an tropa kan PNP nagkakaigwa kan saindang security operation asin dagos nang na-encuentro an maabot sa viente (20) CNTs sa linderos kan Barangay Baras, Esperanza, Malut-od Placer, Masbate.

Inabot nin masarong oras an bakbakan asin nabawi an sarong R4 rifle, duwang M653 rifles, sarong garand rifle, duwang rifle grenades, sarong granada, anti personnel mines asin mga propaganda materials.

Digdi sa Camarines Sur nagkaigwa man nin encuentro na nagresulta man sa pagkakagadan kan sarong rebeldeng NPA sa Barangay Salvacion, Ragay kan Domingo, Deciembre 12 hapon.

Inabot nin 30 minutos an bakbakan mantang nabawi an duwang M16 rifles asin bandolier.

Maabot sa sampulong armadong NPA an saindang na-encuentro na pinangenotan kan grupo 9th Infantry Battalion, 92nd Division Reconnaissance Company, 1st Camarines Sur Provincial Mobile Force Company, PNP Camarines Sur asin yaon pa an fuersa kan Camarines Norte Mobile Force Company.

Sa Huban, Sorsogon an mga soldados nakadiscobre kan mga armas asin bomba na tinalbong kan mga rebelde asin dagos na nindang hinukay kasunod kan osip hale sa mga residentes. (dpa)