CPP-NPA-NDF pigdeclarang persona non grata kan LGUs

Nagdadakul nang mga local government unit (LGU) asin barangay council sa Bicol an nagdeclara bilang persona non grata an Communist Party of the Philippines- New People’s Army- National Democratic Front.


Alagad an mga pangaran kan LGUs asin barangay dai pa man nginaranan kan 9th Infantry Division kan Philippine Army sa Bicol na may base sa Camp Elias Angeles, San Jose, Pili, Camarines Sur.


Si Army Major John Paul Belleza, opisyal na parataram kan 9TH ID sa Bicol nagbuyagyag sa lado kan LGUs igwa nang 41 mga municipalidad asin 791 mga barangay council hale sa anom na provincia kan Kabikolan.


An Camarines Norte iyo an may halangkaw na numero nin mga municipalid na igwang 12 asin 266 na barangay; Camarines Sur igwang 11 mga municipalidad asin 352 na barangay; Catanduanes igwang 5 mga municipalidad asin 35 barangay; Masbate igwang 2 mga municipalidad asin 46 na barangay; Albay igwa sanang sarong municipalidad asin 8 barangay asin sa Sorsogon mayong municipalidad envez 84 barangay.


An saindang kanya-kanyang Sangguniang Bayan asin Barangay Council iyo an nagpasar kan resolusyon na pinirmihan man kan saindang jefe ejecutivo.


Kulang pa ini sa cincuenta por cientong LGUs sa rehiyon na nagpasar nin resolucion asin posibleng dai natatawan nin prioridad huli kan pandemya asin mga nagrapadong bagyo sa Kabikolan, sabi pa kan opisyal kan 9th ID.


Pinadarahan man kopya iyo an Department of Interior and Local Government (DILG) asin 9th ID.


An DILG pigmamandohan an mga LGU na dapat magpasar nin resolusyon nganin ideclarang persona non grata an kumunistang grupo.


Alagad an isyung ini pig-aacusar kan CPP nin huli ta pigpipirit an LGUs sagcod na tinatakot sa saindang budget, sa lado kan DILG sa paagi ni Secretary Eduardo Ano, pinahimutikan an akusyasyon na ini kan CPP.


Kan nakaaging semana pig-anunciar kan DILG na igwa nang 1,546 na LGUs nationwide pigdeclara an CPP/NPA/NDF.


Communist Party of the Philippines (CCP) macelebrar kan ika-52 na aniversario sa Deciembre 26 alagad naka-alerto an Phil Army sa posibleng pag-atake sa tropa kan gobierno.