CPs suportado kan Bicol PNP
Suportado kan Philippine National Police (PNP) sa Bicol an nagwawarak na mga community pantry (CP) dawa sabihon ‘‘makawala’’ o ano paman na organisasyon an mahalaga digdi iyo an pagtarabangan sa tahaw kan krisis sa pandemya.
‘‘Makawala kaman o Kanan’’ dai kami nag-aakusaran mantang an dapat tawan importancia digdi iyo an bayanihan kan Filipino o Bicolano na nakakatabang sa kagutoman lalo na si mga tios na familia.
Si P/Major Malou Calubaquid, opisyal na parataram kan Camp Semion Ola na may base sa Ciudad nin Legazpi nagpahayag kaini kasunod kan akusasyon na igwang community pantries na ginagamit kan Communist Party of the Philippines/ New Peoples Army (CPP/NPA.
Saiya pang sinabi na ‘‘magtarabangan nalang kita dai isipon na may nakikinabang na ibang kolor sa kabilogan an Filipino nagtatarabangan.”
Sa Bicol nagtutubod an Bicol PNP na dai pig-gagamit an mga community pantry kan kumunistang grupo alagad sa ibang rehiyon kun tudo nagdidistribuer pa nin flyers.
An isyu sa red tagging kan gobierno nagpuon sa pinaka-enot na Maginhawa Community Pantry na pig-pundar ni Ms. Ann Patricia Non kan Ciudad nin Quezon alagad pig-adaptar naman sa manlaen-laen na ciudades asin provincia.
Nagkapera nang mga Municipal Police Station sa Bicol an nagtugdas naman kan saindang community pantries sa ciudades kan Legazpi, Ligao sa provincia nin Albay maging sa Ciudad nin Naga sa paagi kan feeding program.
An iba pang CPs nagpapadagos sa barangay San Felipe, Concepcion Pequeña, Dayangdang gabos sa Ciudad nin Naga, Bato, San Jose, Ciudad nin Iriga, Libmanan, Pasacao gabos digdi sa Camarines Sur mantang nagbugtak naman an ibang grupo sa Camarines Norte asin Sorsogon.
Sinabi ni Calubaquid temporaryo sana an sinambit na tabang comunidad sa tahaw kan nagpapadagos na krisis sa salud na apektado kan mga lockdown asin nawaran nin trabajo.
Hinagad kan Bicol PNP sa mga namamahala kan CPs na dapat estrictong masunod an social distancing asin iba pang health protocols.
Nag-aatubang ngunian sa controvercia an National Task Force to End local Community Armed Conflict huli ta iyo an pig-aakusaran sa red tagging na pigsasahotan an Maginhawa CP na ginagamit kan kumunistang grupo. (DPAureus)