CSNHS dai masabay sa face-to-classes

An Camarines Sur National High School (CSNHS), Peñafrancia Avenue, Ciudad nin Naga na iyo an may pinakadakulang populasyon nin mga estudiantes sa Bicol dai pa masabay ngunian na bulan sa pagbuelta sa face-to-face classes.


Dai pa preparado an mga classroom sa saindang Liboton extension na ginamit kan lokal na gobierno para sa quarantine facilities sa mga pasyente sa coronavirus disease.


Si Sulficio Alferez III, Principal kan CSNHS nagpahayag na nakaandam sinda para sa limited face-to-face classes kasabay na kan burukasan nin klase sa Septiembre 2022.


An mga classroom sa Liboton extension kaipuhan pa an rehabilitasyon sa mga kisami na nadestroso kan nakaaging bagyo asin kaipuhan malinigan nin husto mantang ginibong quarantine facilities kan ciudad.


Puon na magbungkaras an Covid-19 sa ciudad enterong okupado an mga classroom asin nagkakaigwa na nin disinfection nganing malinig laban sa virus oras na magbuelta na sinda sa limited F2F.


An mga magurang langkag na sa pagbalik kan saindang estudiantes sa in-person classes mantang nagtutubod sinda na lawgaw an online classes maging sa modular learning.


An saindang escuelahan na igwa nang 11,700 na estudiantes hale sa dating 11,300 iyo na an pinakalangkaw na populasyon sa Kabikolan sa secondary school alagad dai man apektado an mga nagpalista sa sainda dawa panahon nin pandemya.


Digdi sa Naga an Panicuason Elementary School sa Barangay Panicuason iyo pa sana an nagbuelta sa F2F.


Sa Bicol State College of Applied Sciences and Technology (BISCAST), sinabi ni Orbel Cepeda, Vice President for Finance na sainda nang pig-aandaman an pagbuelta sa in-person classes ngunian na taon alagad saindang iimplementar an cincuenta por cientong estudiantes sa cada classroom.


Saindang ipapasunod an limited F2F, iba pang mga health protocols asin mabugtak nin isolation room na pigmamando kan national IATF. (dpa)