CSur Licensing Center kan LTO ibubugtak sa Pili, CSur

An Land Transportation Office (LTO) magkakaigwa na nin sarong opisina na aapodon nin Camarines Sur Licensing Center na exclusibo an transaksyon para sa pagkua nin lisensiya sa pagmaniho, renewal man o bagohan asin student permit.

Marerealisar an bagong opisina oras na maaprubaran an House Bill 6712 ni 3rd district Congressman Gabriel H. Bordado Jr. na mabugtak nin regular LTO District Office sa municipalidad kan Pili, Camarines Sur, sabi ni Frederick Torrecampo an opisyal na parataram kan LTO District Office sa Ciudad nin Naga.

An ahencia igwa nang Pili Extension Office sa Pili, Camarines Sur.

Aroaldaw suroksokan an mga may transaksyon sa Naga District Office, kun marealisar na an bill ni Congresista Bordado alagad magpapadagos man giraray si dating mga transaksyon sa distrito office kan ciudad.

Sinabi pa ni Torrecampo si LTO regional director Francisco Ranches na pabor sa sinambit na bill nagkaulay na sinda kan lehislador kan tercer distrito kan Camarines Sur antes pigsangat an HB 6712 kan Deciembre 15, 2022 sa presenting 19th Congress.

An bill ‘‘An act creating a regular LTO District Office in the Municipality of Pili, Camarines Sur to be known as the LTO Licensing Center of Pili, Camarines Sur, appropriating funds therefor and for other purposes.’’

An Camarines Sur pinakadakulang provincia sa Bicol base sa 2020 Census sa populasyon kan Philippine Statistic Authority (PSA) igwa nang total population na 2,068,244.

Sa limang mga district office sa Camarines Sur an district office sa Naga iyo an pigdadagsa nin mga kliente.

Ipinahayag pa kan LTO District Office si ibang mga municipalidad na sakop kan ibang mga district offices sa Partido District, Ciudad nin Iriga, Pamplona, asin Ragay puedeng magtransaksyon sa LTO Licensing Center sa kabisera kan provincia. (dpa)