Cultura, turismo orug pang paparambongon
Ni Sonny Malate
Tigaon, Camarines Sur --- Orug pang paparambongon an turismo asin cultura kan banwaan na ini mientras na an ika-217 taon na celebracion kan parroquia ni Santa Clara de Assisi irorokyaw sa sarong semanang mga actividades. An mismong kafiestahan kan parroquia sa Agusto 11-12.
Nagkakapira sana sa mga makolor, maconsuelo asin vivong tampok na mga actividades iyo an Linggo ng Kabataan, Cultural competition, Indigenous Peoples Day, Zumbarangay, Street Parade Competition, Kurit Painting Competition, Fun Run asin Coastal Clean Up.
Dagdag na dadalanon asin kaogmahan iyo an Indayog Dance Showdown, Musikansyon, Miss Tigaon Beauty Pageant asin Ginoong Partido.
An famosong Devotional Dance gigibohon man sa Patio kan simbahan ni Santa Clara de Assisi sa Agosto 11. Ini an popular na gawing religioso sa paagi kan pagbayle asin pag-arang ki Santa Clara de Assisi kan mga mag-agom na dae o haloy mabiyayaan nin aki.
Segun ki Algene Pelo Panoy, pamayo kan Cultural Heritage, Events, Arts and Tourism Office, an local na gobyerno kan Tigaon sa liderato ni Alkaldesa Chiqui B. Fuentebella, an nakatalaan na maglatag kan Phase One o primerong limang taon kan Municipal Tourism Development Plan tanganing mapagantad an turismo asin mapreservar an mayaman na cultura asin arte kan Tigaon.
Saro sa mga entries sa Kurit Painting Competition katakod kan Pintakasi ni Santa Clara de Assisi, Patrona kan Tigaon. (Photo LGU Tigaon)
An nabanggit na oficina iyo an naglatag kan hashtag na “Visitahon Tigaon” na iguang advocacia na orug na mabisto asin mapabaskog an industria kan turismo sa Tigaon.
Nanotaran ni Panoy na an makawiliwiling atraction pang turismo kan Tigaon, afuera kan nagkakapirang magagayon na lugar digdi, iyo mismo an mayaman na cultura asin istorya kaini bilang sarong banwa kan panahon pa kan Kastila asin Hapon. An Tigaon nagcelebrar kan ika-321 Founding Anniversary kan bulan na Abril, 2023.
Sa presente, an Tigaon bistadong sarong centro na kinakamugtakan kan mga oficinang panggobyerno asin iguang mga privadong colegio na pigkaklasehan kan mga estudyanteng an napiling curso mayo sa Partido State University, an pinakadakulang tertiary public school sa Partido Area.
Si Panoy an naoogma man na iguang nagbutwaan na mga structura asin actividad sa distrito kan Partido na nagcocomplemento sa esfuerzos kan local na gobyerno dapit sa turismo.
Enot, an planong pahiwason an Baybayon Festival tanganing maibale na an banwaan nin Tigaon asin San Jose afuera sa Sagñay. An festival na ini haloy nang makusog an hatak sa mga turista.
Ikaduwa, an pagconstruir kan Partido Boulevard na nakaengganyar nin kadakol na mga local na turista sa magayon asin buwelong tinampong nag-aagi sa coastal na mga barangay sa portion kan Sagñay, Tigaon asin San Jose, orug na pagkabanggi.
Siring man, an proponedong Partido International Airport sa banwaan kan San Jose, na pigmamaigotan ni Cong. Arnie B. Fuentebella na marealizar na pakatapos na ini an iginilid nin huli sa higot na pagkontra kan nagkakapirang politico.
Nanotaran man ni Panoy na dakulaon na tabang sa pagparambong kan turismo asin arte, asin pagpreservar kan cultura kan Tigaon iyo an progresibong kaisipan ni Alkaldesa Fuentebella asin Sangguniang Bayan, asin suporta ninda Cong. Arnie B. Fuentebella, mga Board Member na sinda Emmanuel Llaguno asin Eugene Fuentebella pating ibang stakeholders.