DA mawaras nin ayuda sa paraoma sa Bicol, politico bawal mag-Epal

An Department of Agriculture (DA) iyo an dapat mamahala sa pagdistribuer nin asistencia pinansyal o ayuda kun hale sa sainda an fondo na iwawaras sa sektor nin paraoma na dai kaipuhan an presencia nin politico nganing mag-epal mantang yaon na sa panahon kan election period.

Sa enot na cuarto ngunian na taon an DA nakatalaan magwaras nin tig-a P7,000 sa lambang paraoma sa Bicol na iguang total na 186,309 na paraoma na an fondo hale sa saindang programa sa Rice Competitiveness Enhancement Fund (RCEF).

Ini an piglinaw kan Commission on Election (Comelec) sa paagi ni Atty. Maico Julia Jr, Election Officer sa Ciudad nin Naga sa tahaw kan naenot na pahayag kan saindang opisina sentral na prohibido sa arin man na politico na mag-Epal sa pagwaras nin PAYOUTS o AYUDA siring kan relief goods hale sa Department of Social Welfare and Development (DSWD) siring kan Ayuda sa Kapos ang Kita Program (AKAP) asin iba pa nganing dai makabentaje orog na gamiton sa kampanya sa maabot na midterm elections sa Mayo 12, 2025.

Laen pa kaiyan, bawal an pagbugtak kan saindang tarpaulin na malinaw ginagamit sa pamumolitica.

An nangyayari pa an mga candidato naplatica ngona sa atubangan kan mga recipiyentes antes iwaras an payouts o ayuda.

Saiya pang sinabi na bako lang sa DSWD envez iba pang ahencia na an cuarta hale sa gobierno.

Dinagdag pa kan komisyon, sinda nagbabantay kan mga hiro nin politico na mabalga sa election code.

‘‘Thus disqualification can either be before or even after the candidates won’’.