Daet, Naga nangenotan sa paglaban kontra droga
Maigot an kampanya kan Philippine National Police sa Bicol laban sa ilegal na droga mantang an Municipal Police Stations kan Daet, Camarines Norte asin Ciudad nin Naga iyo an may halangkaw na nakumfiscar kan huring semana kan Febrero 2023.
Sa listahan kan may halangkaw na nakumfiscar na droga, an Municipal Police Station (MPS) kan Daet, CamNorte nakabawi nin sobra sa 150 gramos nin ‘‘shabu’’na may cantidad nin P1,020,000.00. An droga nabawi sa posesyon asin kontrol ni Catherine Quibral alyas ‘‘KAT’’ 30 anyos asin residente kan Barangay Pamorangon, Daet, CamNorte. Siya nasa listahan komo ‘‘high-value-individual’’ (HVI).
An PDEA-CamNorte, Provincial Intelligence Unit-Camarines Norte PPO asin Daet MPS iyo an mga arresting officer.
Nagsunod an Naga City Police Office (NCPO) sa Ciudad nin Naga, duwang mga nagkasiriog kan mga awtoridad kan Station 4 na sinda Bong Blanquera y Romualdo, 45 anyos, residente kan Block 1, Lot 4 Minerva St., Villa Corazon, Del Rosario asin Jume; Frederick Camalia y Tendenilla, 34 anyos, kan Macaroy Compound, Lomeda, San Felipe gabos kan Ciudad nin Naga. Nakumfiscar sa sainda iyo an 75 gramos nin ‘‘shabu’’ nagcacantidad P510,000. An mga envueltong awtoridad na responsable sa pag-dakop sa sainda iyo an City Intelligence Unit asin Mobile Force Company, gabos kan Naga CPO asin an operasyon ginibo sa Zona 1, Barangay Carolina.
Sa islang provincia kan Masbate, an Provincial Intelligence Unit-PPDEU, Palanas MPS, Regional Drug Enforcement Unit, Regional Mobile Force Battalion 5 nakakumfiscar nin 50 gramos nin ‘‘shabu’’ na may cantidad P340,000. Hali sa suspechadong si Marvin Acuna y Canete, 33 anyos, residente kan Brgy. Canomay, Dimasalang, Masbate, mientras na sarong suspechado pigbistong si Ronie Banda y Adigue nakadulag sa ginibong drug operation.
An sinambit na mga operasyon magkasuhay na ginibo kan Febrero 22, 2023 na igwang total na P1.8 milyon na cantidad kan droga.
Gabos na mga nagdarakop nag-aatubang nang caso sa corte sa pagbalga kan Comprehensive Drugs Act of 2002 o RA 9165. Sinda anas yaon na sa custodia kan PNP.
An naginibohan nagpapaheling na dai nagkukulpa an operasyon kan PNP asin PDEA kontra sa ilegal na droga mantang nagiging epektibo an kampanya ka-partner an KASIMBAYANAN asin an comunidad sa barangay.
Pigtitipon pa si ibang mga report sa mga MPS sa saindang acomplisimiento kontra sa ilegal na actividad. (dpa)