Dagdag tarifa sa Casureco II dai na pinapaagi sa public hearing

Dai na pinapaagi sa public hearing an paglumpat kan singil sa tarifa sa kuryente kan Camarines Sur II Electric Cooperative (Casureco II) mantang an saindang pinapadatulan na dahilan causa nin paglangkaw kan ‘‘generation costs’’ na pig-iimponer kan saindang power generators.

Kan Deciembre 2022 bigla naman nag-imponer nin singil sa tarifa sa kuryente an Casureco II dawa dai na nag-aagi sa public hearing.

Sinabi ni Rinner Bucay, opisyal na parataram kan cooperativa nin electricidad naglangkaw nin 64 centavos an saindang sinisingil sa residential consumers na ngunian igwa nang P17.513/kwh; sa Low Voltage igwang dugang na 64 centavos na nagcacantidad nang P16.6363/kwh; asin sa High Voltage igwang dugang na 60 centavos na ngunian P15.6810/kwh.

Antes kan pandemya nag-aabot sana sa P9.00 an tarifa kan Casureco II alagad sagcod sa ngunian padagos na naglalangkaw na an nagiging isyu iyo an halangkaw na generation costs na sinisingil kan mga power generators.

An nangyayari sa Casureco II kun nalangkaw an tarifa kan power generators kaparejo man kan ibang cooperativa nin electricidad sa nasyon nagsisingil man nin dagdag na singil.

Digdi sa Camarines Sur, unikong nagsisingil nin hababang tarifa sa cantidad na P9.00 iyo an Casureco IV mantang an saindang power supplier iyo an Power Sector Assets and Liabilities Management Corporation (PSALM) na nagkukua nin suplay nin kuryente sa Tiwi Geothermal Plant na ngunian pababa na an saindang suplay.

Sinabi pa kan cooperativa ano man na iimponer na dagdag sa tarifa sa kuryente kun hali sa saindang manijamiento an petisyon naagi sa public hearing na pinapaapod kan Energy Regulatory Board (ERB).

Mientras tanto, pig-energized na an bagong 20MVA power transformer sa Barangay San Felipe Substation sa Ciudad nin Naga. Ini maserbe sa itaas na barangay kan ciudad, pagtaraid na barangay maging sa pagtaraid na banwaan. (dpa)