top of page

Dakulang art exhibit gigibohon sa Partido area

Sarong dakulang art exhibit an gigibohon sa banwaan kan Goa, Camarines Sur sa Hunyo 15-25, 2024 sa atubangan kan Townscape Commercial Bldg. digdi. Tampok iyo an mga piyesang nahimo kan mga miembros kan Partido Artists Group (PAG). Tema kan art exhibit: “Pagsirang”.


Linalaoman na 22 na mga visual artists na kabale sa sub-group na ini sa irarom kan PAG an maparticipar sa primerong art exhibit kan grupo. An PAG katiriponan kan mga artista sa cuarto distrito na may hararom na passion sa Visual, Literary, Performing, Media asin Multi-Disciplinary Arts. 


An PAG pigbilog tanganing an mga invuelto sa arteng nabanggit  an magkaiguang pagkasararo. Sa paagi kaini, an saindang mga interes mapoprotehiran tanganing orug na magin actibo asin  epektibong mga contribuente sa karahayan kan comunidad. Siring man, an arte, cultura asin turismo sa Partido Area an danay na maparambong sa paagi kaini.


An art exhibit nahimo sa initiativa kan visual artists sub-group na an coordinator si Kim Real.  Suportado man siya nin dakulang numero nin pag-iriba sa sinabing sub-group. 


An mga ilalatag na piyesa  an ibebenta sa medyo hababa sanang  presyo mantang an mga kabaraleng  visual artists an nagpopoonpoon pa sanang magparticipar sa arog kaining exhibit.


Mientrastanto, si Real asin pag-iribang sinda Oriel Mostar, Jr., Christian Prieto, Darwin John Villaralvo, Maria Angela Alvea, Reinah Ledesma, Nelson Pintor Enciso asin Lorna Tagle Margate an dati nang may experiencia sa pagparticipar sa mga art exhibit. 


Sinda Real, Ledesma, Enciso asin Margate an miembros kan Salingoy Art Group na nakabase sa ciudad nin Naga.


An gigibohon na art exhibit primero pa sanang actividad  na nakalinya sa mga programa kan PAG ngonian na taon. Sa mga masunod na bulan, mga macolor, makahulugan asin bibong actividad an mahihimate kan comunidad sa paagi kan artists group.


Sa presente, an artists group sibot sa pag-asikaso kan mga pangenot na mga requisitos tanganing magin areglado asin madalahay an pagmanehar kan bagong muknaon na grupo. 


Kabarale sa plano kan PAG an pakikipagcoordinar, colaborasyon  asin paghagad nin asistencia sa gobyerno asin pribadong sector tanganing maibusol an mga advocacia, programa asin proyektong gigibohon sa maabot na mga bulan.


Yaon  pa man digdi iyo an pagpili nin mga magigin Honorary Member na mataong giya, suporta moral asin inspiration sa organisasyon. Initialmente, kabarale  digdi iyo sinda international civic leader, philontrapist, Atty. Francis Padua Papica, famosong artist Pancho  Piano na propiong Lagonoyon, Arnel B. Zarcedo, EDEL, Presidente kan Partido State University (ParSU).


Ibabale pa man sinda Ms. Christina Rellora-Monasterio, sarong negociante asin civic leader. Kaiba pa man si Dr. Danilo M. Gerona, researcher, writer, historian, Director kan Reserch Center for Partido Studies kan ParSU.


Linalaoman na an art exhibit maserbing kapinonan kan bibo asin makahulugan na papel kan grupo kan mga local na artista sa pagparambong kan arte, cultura asin turismo sa Partido Area.

“Kasag saka Kasili” ni Kim Real, saro sa mga piyesang tampok sa art exhibit kan Partido Artists Group. (Photo PAG)

Comments


bottom of page