top of page

DAMPA-CamSur namumundo sa pagkaka-arestar kan 4 na paraoma

An Damayan nin Paraoma sa Camarines Sur (DAMPA-CSur) namumundo sa nangyari sa saindang pag-iriba sa Pili, Camarines Sur apesar na nagpapahayag sana kan saindang deretso sa paagi nin protesta asin iba pa contra sa pagpahiwas kan Naga Airport sa Camarines Sur huli ta apektado an saindang ‘‘irrigated’’ na kaomahan alagad caso kriminal an saindang inaatubang.


Ini an punto ni Jose Retubio asin mga pag-iriba ninda sa DAMPA-CSur na sinda Nenita Petalio, William Petallo, Jose asin Artemio Sanchez na inarestar kan Pili Municipal Police Station kan Hunyo 19, 2023 huli sa casong Cybercrime Prevention Act of 2012 (Section 4 (c) (4) kan RA 10175 na sinangat kan Capitolio Provincial. Gabos sinda paraoma asin nabubuhay sa pagtanum paroy sa Sitio Caorasan, San Agustin, Pili, Camarines Sur.


An caso asin pagkaka-arestar huli kan nangyaring insidente kan 2018 sa kabesira kan provincia sa isyu kan pagpahiwas kan Naga Airport na envuelto sinda dating Congressman Rolando Andaya Jr. asin Alcalde Tomas Bongalonta.


An mandamiento de aresta pig-isyu kan RTC, National Capital Judicial Region, Branch 90, Ciudad nin Quezon na pirmado ni Presiding Judge Maria Zoralda Zabat Tuazon.


Si Bongalonta kabale sa mga kinasohan matapos nakabayad tolos nin piyansa sa corte sa Ciudad nin Quezon. An paraoma nakaluwas na sa carcel matapos makabayad nin tig-a P50,000 na piyansa.


An kaparejong insidente kan 2018 huli sa ginibong dumping nin toneladang daga sa tinampo pasiring sa Sitio Caorasan, na nagresulta nin kariribokan, pag panic kan paraoma mantang apektado sinda. Huli kaini, an grupo nagsombong ki Alcalde Bongalonta sagcod na nagkaigwa nin komprontasyon. Mientras na nagkakaigwa nin kariribokan sinda inarestar kan mga awtoridad, sabi pa kan DAMPA.


Hinuhurot kan DAMPA-CSur, an Department of Agrarian Reform kinakaipuhan mag-aksyon sa isyu asin agrangay kontra sa pagpahiwas kan Naga Airport mantang an ahencia iyo an may jurisdiksyon asin an mga apektadong paraoma bilang mga benipisyaryo kan programa orog na si mga inarestar. Sinda igwa nang pugol na Transfer Certificate Title asin sinda gabos na nakabayad sa amortization,


An Kilusang Magbubukid ng Bicol nagsusuporta sa mga inarestar na paraoma huli ta deretso ninda magprotesta kun natititinaktinakan an saindang deretso alagad kinasohan sa corte.

Commenti


bottom of page