Danyos sa fish kill sa CSur nag-abot na sa P15-M

Buhi, Camarines Sur --- Nagsakat na sa Php15-M an danyos sa 1,390 fishcages sa Lake Buhi, sa banwaan na ini base sa pinakahuring na-ikurit kan lokal na gobierno kan Buhi, Camarines Sur.


Si Nonie Enolva, ofisyal na parataram kan Bureau of Fisheries and Aquatic Resources (BFAR) na may opisina sa Bula, Camarines Sur nagpahayag sa Bicol Mail an sinambit na danyos saro pa sa dahilan iyo an nakaaging bagyong Paeng kan Oktubre 29, 2022.


Alagad sa resulta kan water sampling na hinagad ni Alcalde Rey Lacoste kan LGU Buhi sa BFAR Bicol nagluluwas na afuera kan calamidad nagbaba an normal level asin dissolved oxygen (hali sa 0.45 hasta 4.53 parts per million) sa pinagkuanan na onseng barangay kan water sample.


Sinabi sa laboratory result naglangkaw an amnonia (hali 0.08) hasta 18.19 mg /L) sa Lake Buhi na saro sa dahilan sa nangyaring fish kill.


An sinambit na fish kill enot nang pig-report kan mga parasira hale sa barangay kan Tambo asin Cabatuan. An Lake Development Office saro man sa nag-iinbestigar kan sinambit na destroso alagad kabali sa pigdahilan iyo an ‘‘severe Tropical Storm Paeng’’.


An danyos dakulang epekto sa mga parasira na iyo an saindang hanap buhay sagcod na nagbagsak an presyo sa Php20 cada kilo.


Dinagdag pa kan BFAR na dapat magkaigwa nin inbentaryo kun sobrado nang marhay an fishcages asin ini an saindang babasehan sa pagtao nin ayuda sa apektadong parasira.


Mientras tanto, sagcod sa ngunian mantenido pa kan ahencia an ‘‘red tide’’ sa coastal waters kan Milagos, Masbate na sagcod sa ngunian ‘‘positive for toxic red tide’’ base sa saindang Shellfish Bulletin No. 21. An iba pang tolong mga lugar na nasa ‘‘monitoring’’ kan saindang ahencia na libredo pa sa toxic red tide iyo an Sorsogon Bay, Juag Lagoon sa Matnog, Sorsogon asin coastal waters kan Mandaon sa Masbate.

LGU BUHI Photo