Daog, gana saeleksyon dapat mag sumiter nin SOCE- Comelec

An gabos na mga nagcandidato sa nagtapos na midterm elections kan Mayo 12, 2025 gana o daog obligado na magsumiter kan saindang Statement of Contributions and Expenditures (SOCE) na nagsikad na kan Mayo 13 hasta Hunyo 11, 2025.

Alagad si masinutil na dai mag-file iguang penalidad na dai na tutugotan makakandidato liwat sa masunod na mga eleksyon lokal o nasyonal.

Ini an patanid ni Atty. Maico Julia Jr. Election Officer kan Commission on Election (Comelec) sa Ciudad nin Naga mantang limitado sana sa 30 diyas nganing mag-file kan saindang SOCE.

Piglinaw kan Comelec na kabale digdi si mga official candidate, political parties, asin party-list.

Kaipuhan isumiter dawa si dai naggastos asin nakarecibe nin kontribusyon; si mga dai nagpadagos kan saindang kampanya; si mga self-funded an saindang gastos sa kampanya; dawa si mga nagsibog kan saindang candidatura alagad dai na kaipuhan magsumiter nin SOCE kun nagsibog antes magsikad an campaign period; asin dapat notoryado an SOCE asin pirmado kan candidato o party treasurer kan partido political asin party-list.

Dinagdag pa kan Comelec Naga na an sainda naman na pig-aandaman iyo an maabot na Sangguniang Kabataan, Barangay elections sa maabot na Deciembre 2025.

Igua naman plano an congreso na i-uktaba an sinambit na pirilian alagad magdedepende sa sainda kun aaprubaran mantang padagos an saindang preparasyon, sabi pa ni Julia.

An propuesto kan ibang lehislador mawot ipako sa apat na taon an termino kan SK asin Brgy officials.