DAPAT MAY CLEARANCE AN COMELEC: Suspension order daima iimplementar-DILG

An Department of Interior and Local Government (DILG) dai makaka-implementar nin suspension order kan Ombudsman contra ki Pili, CSur Mayor Tomas Bongalonta sagcod na mayong clearance hale sa Commission on Election.

Estrictong pig-iimplementar kan commission an saindang calendar of activities na saro na digdi an election ban na bawal muna an implementasyon nin ano man na suspension sa arin man na opisyales lokal huli sa caso administrativo.

Mala ngani kabale man an paghaklas sa serbisyo kan empleados kan ahencia de gobierno asin prohibido pa an pag-nombra nin permanent maging casual asin job order na empleado kan LGU.

Ini an piglinaw kan DILG Camarines Sur sa pamamayo ni Provincial Director Melody Relucio sa tahaw kan mga kahapotan kun saiya nang narecibe an tolong bulan na suspension order hale sa Ombudsman contra ki Alcalde Bongalonta kan Pili, Camarines Sur, alagad sinabi kaini dai pa siya nakakarecibe kan desisyon nganing iimplementar.

Magdedepende sa caso alagad kun igwa man na kopya kan desisyon nganing iimplementar dapat magkua ngona siya nin clearance hale sa Comelec, sabi pa ni Relucio.

An alcalde kan kabesira kan Camararines Sur nakakabalik palang sa puesto kan Abril 21, 2022 hale sa anom na bulan na suspension kan Capitolyo Provincial huli sa caso administrativo.

An caso contra ki Bongalonta huli kan pagnombra sa municipal administrator na mayong pagtugot an Sanggunian Panlalawigan.

Duwang aldaw palang buelta sa posisyon bilang jefe ejecutivo nagluwas sa social media na sinususpende naman siya kan Ombudsman nin tolong bulan.

Caso administrativo an saiyang inaatubang mantang si caso criminal enot nang binasura, segun sa alcalde.

Naging ugat kan caso sa Ombudsman iyo an reclamo kan nagkaperang mga empleados na ilegal tinanggal sa trabajo kan alcalde apesar na dai pa tapos an contrata.

An caso kan taon pang 2016 alagad binababa sana an desisyon kan Ombudsman kan Marso 31, 2022.

An suspension order huli sa pagbalga kan ‘‘Rule 10, Section 46D asin Section 54 kan 2017 Rules on Administrative Case in the Civil Service, in relation to Administrative Order No. 7 as amended by Administrative Order N. 17, and Section 25 of Republic Act No. 6770’’

Piglinaw pa kan alcalde sagcod kasoodma dai pa siya nakakarecibe nin kopya kan suspension order.

Nagtutubod man an alcalde na dai ma-iimplementar an pigsasabing suspension sa saiya huli kan election ban kan Comelec. (dpa)

SI Alkalde Tom Bongalonta kan banwaan nin Pili, Camarines Sur (naka asul na polo shirt, yaon sa to-o ni Congressman Gabby Bordado) kaiba an saiyang mga suportador sa paglakaw pasiring sa municipal hall kan banwaan nin Pili. Markado an pagbwelta ni Bongalonta sa saiyang opisina bilang sarong kapangganahan kan mga taga-Pili. Yaon man sa retrato sinda Iriga City Mayor Madeliene Alfelor asin Congressman Arnie Fuentebella kan 4th district. (‑‑‑‑‑‑‑‑)