DATING GM, DIRECTORS KINASOHAN SA OMBUDSMAN: MNWD andam iluwas an mga dokumento sa imbestigasyon

Preparado an manijamiento kan Metro Naga Water District (MNWD) na iluwas an gabos na mga dokumento ano man na oras na kaipuhan sa pagsikad sa imbestigasyon kan Ombudsman kasunod kan sinangat na casong pagbalga kan RA 3019 o Anti-Graft Corrupt Practices Act kontra sa dating general manager asin mga nakatukaw na board of directors.

Ini an mga pahayag sa Bicol Mail ni OIC General Manager Florencio Mongoso Jr. sa sinangat na caso sa Ombudsman ni Jake Fortaleza kontra sa mga director na sinda, Gilbert Albuero, Mike Pawid, Marilisa Ampoan, Monina Claveria, dating pamayo kan junta George Palma, dating GM Virgilio Luansing asin real state appraiser Jonathan Orbita.

Si dating board President Emiterio Aman dai kabali sa caso mantang kan gibohon an transaksyon sa daga dai pa siya nanonombrahan bilang director.

Nagcierto nin kooperasyon si Mongoso sa imbetigasyon kan Ombudsman mala ngani pati an mga ‘‘resource persons’’ sa laog kan manijamiento dapat magtestigos kun kaipuhan.

Segun pa sa OIC GM tama sana an pagsangat nin caso nganing maaraman an katutoanan.

Ipinapaheling sa retrato ni Jake Fortaleza sa FB page an mga dokumento sa saiyang sinangat na caso sa Ombudsman kontra sa dating general manager asin mga incumbent directors kan MNWD.

Sa reclamo ni Fortaleza an caso huli sa overpricing sa pagbakal nin daga sa barangay Balatas para sa expansion office kan MNWD na nagcacantidad nin PhpP54,430,000.60.

Saiyang binasihan an COA report kan Hunyo 22, 2022 na igwang iregularidades an pagbakal kan sinambit na lote matapos makua an ginibong pagtasar kan Bureau of Internal Revenue an tamang presyo kan daga Php1,500 cada metro cuadrado bakong Php5,000 na iyo an pigbasehan kan MNWD sa pagbakal kan lote na nagcacantidad nin P54.4 milyon. Kun sa tama sana na cantidad Php1,500 cada metro cuadrado nagcacantidad sanang Php16.1 milyon na binakal kan City Hall.

An MNWD nagkaurokag an manijamiento kan ibuyagyag ni dating board president Aman an mga anomalia sa mga overpricing sa pagbakal nin daga kabali na si lote sa barangay Mabolo, Ciudad nin Naga alagad dai na pigbali sa reclamo sa corte.

Huli kan mga controvercia sa manijamiento si GM Luansing hinali kan junta alagad an dating GM nagsimbag man na ano man na transaksyon sa pagbakal lote iyan aprubado kan mga director.

Sa tahaw kan mga controvercia kabali na an pagkakalugi kan MNWD, si Mongoso na sarong department head kan City Hall iyo ngona an pinatukaw na OIC General Manager. (dpa)