Dating pamayo kan junta, OIC GM kan Casureco I

Igwa nang kabatiran sa pagpadalagan nin cooperativa nin electricidad an nagribay ki dating General Manager Ana Sylvia M. Alisito kan Camarines Sur I Electric Cooperative (Casureco I), Inc. na nagretiro sa serbisyo kan Deciembre 30, 2022.

Si Engr. Noel C. Laureles, dating Board President kan Casureco I asin naging executive assistant ni GM Alsisto iyo an designadong OIC General Manager kan National Electrification Administration alagad nakalaag sa surat kan ahencia ‘’until such time that an Acting General Manager is installed.’’ Boot sabihon an NEA mabugtak nin AGM hali sa saindang ahencia.

Nagkapera sa mga opisyal kan cooperativa nagtutubod na cuestionable sa manijamiento an pagdesignar nin AGM na ‘’outsider’’ mantang an Casureco I bakong ‘’ailing cooperative.’’

Sa onseng taon ni Alsisto bilang GM, pitong taon digdi multi-awarded an Casureco I sa saiyang liderato na sagcod sa ngunian pugol pa ninda an pagiging ‘’Triple A’’.

An nagtutukaw na OIC GM saro sa mga katuwang ni dating GM Alsisto nganing mamantenir kan cooperativa an pagiging ‘’Triple A’’.

Si Alsisto sagcod pa sa Deciembre 30, 2023 matapos aprubaran sa Annual General Membership Member (AGMA) na palawigon pa an saiyang pagiging GM na inaprubaran man kan junta directiva base sa saindang inaprubaran na resolusyon kan Agosto 6, 2021.

Alagad huli kan pakikiaram nin sarong politico sa provincia pinagmarhay na dai na ipadagos an saiyang ‘’extended term of office’’ sagcod na dagos nang nagretiro kan Deciembre 30, 2022. (dpa)