Datos sa bike count kan Naga gamit sa programa na imbwelto an pagbisikleta

Natapos na an tulong aldaw na bicycle counts sa laog kan ciudad nin Naga, sarung proseso nin pagtipon nin datos partikular na an numero kan mga naggagamit nin bisikleta sa laog kan syudad.


Sa pahayag ni Naga City Bicycle board program coordinator Jonathan Hernandez, an bike or bicycle count sa ciudad inorganisa kan lokal na gobyerno kan ciudad sa pakikipagtabangan kan Metro Naga Active Transport Community, Oragon Bikers Inc. - Bicol asin kan mobility awards na ginibo kan petsa 24 sagkod petsa 27 kan Hunyo.


Pigtipon an datos sa paagi nin tarabangan kan mga volunteers na isinabay na an pagbilang kan mga siklista na nag-aagi sa laog kan syudad hali sa mga pagtaraid na banwaan asin idtong mga pasiring sa luwas kan Naga.


Segun ki Hernandez an survey o data gathering gagamiton sa quantitative baseline para sa Naga City, siring man maging basehan sa monitoring kun gurano ka-epektibo asin tamang nagagamit an mga bike lanes na piglatag kan lokal na gobyerno.


Gagamiton man an mga natipon na datos bilang basehan o reference para sa masunod na mga programa o route network planning para madeterminaran an mga lokasyon asin klase nin bike lanes na kaipuhang ilaag kabale an pag-improve pa kan mga pasilidad orog na an pagkaka igwa nin salbadong agihan o mga sidewalks sa laog kan syudad Naga.


An datos na natipon sa bicycle o cyclist counts sa ciudad, iheheras man sa DPWH asin sa City Planning and Development Office bilang reference ninda sa nakatalaan na na pag-implementar nin proyekto o hahamanon na mga tinampo.


Marurumduman, an Naga pigbisto sa enterong Pilipinas kan mobility awards bilang silver awardee as bicycle friendly city huli sa mga inisyatibo, programa asin mga infra project para sa mga parabisikleta.