DAWA INAGIHAN CALAMIDAD: Food security sa Bicol dai apektado - DA

Dawa dakulang cantidad si danyos sa agricultura sa Kabikolan huli kan bagyong Uwan, alagad dai man apektado an food security mantang solamente 6,000 hektarya omahan an apektado sa rehiyon kumpara sa 88,000 hektarya omahan na kadakli nakaani na kan Oktubre 2025.

Ini an pinaluwas na datos kan Department of Agriculture (DA) sa paagi kan saindang opisyal na parataram, Lovella Guarin base man sa sinusumiter na damage report sa sainda hale sa mga Municipal Agriculture Office (MAO) sa rehiyon. Alagad kabale sa apektado iyo an corn plantation, kabatagan, asin iba pang mga gulayon.

Sa initial damage report huli kan nakaaging calamidad inabot na sa P3.7 -B hale sa mga provincia kan Kabikolan na apektado digdi an 45,190 mga paraoma mantang 68,710 hektarya an apektado.

An Catanduanes dakula si danyos sa abaca na nagcacantidad nin P1-B. Huli kaini an DA nagtataong ayuda para sa ‘‘alternative livelihood’’ siring kan cash crops vegetable seeds, livestock and poultry.

Kabali sa ginigibong tabang kan ahencia iyo pagbugtak Kadiwa store sa tabang kan National Food Authority nganing makapabakal nin baratong presyo nin bagas sa cantidad na P20 sa gabos na mga sektor.

Afuera kaini, cantidad P765-M an hinahagad kan DA sa central office nganing itaong ayuda sa apektadong mga paraoma.

Mientras tanto, an paraoma padagos kan saindang agrangay sa baratong presyo nin paroy poon na mag-epekto an Rice Tariffication Law sa dating administrasyon ni Presidente Rodrigo Duterte.