De Lima para gob sa CamSur

Kasunod kan pagbutwa kan pangaran ni Senador Leila De Lima na saro sa kinukunsiderar kan ibang mga abogado sa Camarines Sur na dapat iyo na an isabat kan partido liberal bilang candidatong gobernador contra ki Louige Villafuerte sa eleksyon sa Mayo 9, 2022.

Nakatalaan hapoton ni Bise Presidente Leni Robredo an senador na tubong Ciudad nin Iriga kun bukas siya na magdalagan sa cargong gobernador sa Camarines Sur.


Nabigla an bise presidente kan ipaabot sa saiya sa press conference sa Ciudad nin Naga kan Hulyo 23, 2021 na igwang nagkaperang abogado an nagrerekomendar na puedeng ilaban kan LP sa Camarines Sur mantang tubong Ciudad nin Iriga.


Sinabi pa bilang taga Iriga calificado pang magparehistro sa Comelec hasta sa Septiembre 30, 2021 komo votante asin magcandidato sa lokal sa maabot na eleksyon.


Pighalimbawa ninda na nangyari na ini ki Senador Antonio Trillanes III na nagcandidatong senador mientras na yaon siya sa laog kan selda kan Philippine National Police asin ki dipuntong dating Senador Ninoy Aquino kan panahon kan martial law.


Pacil na an kampanya nin huli kan pandemya puede sa social media asin virtual.


An Bicolanang senadora nag-anunciar na kan saiyang ambisyon na mag-re eleksyon alagad ipapaabot giraray kan bise presidente kun bukas sa pagcandidato sa eleksyon lokal.


Si VP Robredo iyo an enot na pigtutulod kan mga congresista sa Camarines Sur na magcandidatong gobernador alagad sagcod sa ngunian dai pa napaluwas kan saindang plano kun sa eleksyon lokal o nasyonal.


Sa kaparejong press conference an bise presidente liwat nagsimbag sa kahapotan sa politica na madesisyon siya sa Septiembre 2021 kun anong puesto an dadalagan sa Mayo 2022 eleksyon.


Saiyang pang sinabi na prioridad niya an trabajo laban sa Covid-19 envez kan politica. Prueba kaini, saiyang dinadara sa Ciudad nin Naga an vaccine express kan OVP nganing kaskasan an turudokan bakuna. (DPAureus)