DE Ragragio promoted na alagad binalyo sa Capiz DPWH

Si Assistant District Engr. Richard Emmanuel Ragragio kan Camarines Sur 3rd Engineering District sa Baras, Canaman, CamSur promoted na komo district engineer alagad madedestino sa Capiz City 2nd Engineering District kan Department of Public Works and Highways (DPWH) sa rehiyon 6 puon kan Deciembre 1, 2021.

Kinumfirmar ni ADE Ragrario na saiya nang narecibe an special order hale ki Acting Secretary Roger Mercado kan DPWH Central Office asin saiyang piglinaw na normal sa saindang ahencia an pag-ukag kan mga opisyal na puedeng makabalik man sana digdi sa Bicol, dai maaraman kun nuarin.


Nagluwas man an enot na report na si Ragragio madedestino sa Catanduanes bilang district engineer kan DPWH, alagad dai na nadagos.


Maging an posisyon na regional director, assistant regional director dai permanente sa sarong rehiyon kaparejo man kan mga district engineer asin assistant district ano man na aldaw puedeng ibalyong destino.


Designado siya komo OIC District Engr. kan Capiz City Engineering District kan DPWH, alagad an saiyang paghale sa 3rd Engineering District piglalanatan kan mga opisyal asin empleados huli kan marhay na liderato asin pagmanijar kan opisina.


Si Engr. Eduardo Alejo, jefe kan Maintenance Section iyo man an designado komo OIC assistant district engr.


An opisina rehiyonal kan DPWH sa pamamayo ni Director Virgilio Eduarte nagtutubod na posibeng igwa pang ibang opisyal kan ahencia sa Bicol an ibalyong destino alagad dai naman nginaranan. (dpa)