Dear Mr. Lonely

Minsan pang igua nin sarong Announcer sa Radyo kan dekada 80, na hinangaan nin kadakol na mga listeners lalo na nin mga kababaihan, ini mayong iba kundi si Edgardo “Kuya Ed” de la Rosa. Si Ed de la Rosa, tubong Barangay Tibgao, Canaman, Camarines Sur, alagad naka base ngonian sa Los Angeles, USA kaibahan an saiyang esposa na si Aida de la Rosa. Sa radyo DWRN na yaon kaidto sa Queborac, na pinapamayuhan ni Atty. Celso Baguio, asin ako man kaidto an Program Manager. Kan kabangaan kan dekada 80, naglaog nilang Announcer sa DWRN si Ed de la Rosa asin saiyang kinaputan an pang banguing program na “ Dear Mr. Lonely”, ini guno sa sarong sonata ni Bobby Vinton na iguang parehong titulo. Kaidtong panahon, higot an kumpetisyon sa mga AM radio ta dai pa uso an FM na poros sana turogtugan mantang an AM radio arog kan DWRN, igua nin mga bareta, komentaryo, personality programs, mga harana, amateur, asin drama. An mga announcer nadadangog poon sign on alas 4 nin aga sagkod alas 12 nin Matanga, asin an programa ni Kuya Ed, Dear Mr. Lonely nadadangog sa pagka Bangui. Sa haloy mi na sa radyo, solamente si Ed de la Rosa an announcer sa DWRN na ba’gohan sa mikropono alagad kadakol tolos nin mga tagahanga. Dara ni Kuya Ed an magayon na tindog nin sarong taga radyo ta ini halangkaw, guapo, magayon an tindog , intelehente asin igua nin maragsik na boses kaya minsan pa siyang binansagan na Man with the golden voice in radio. An programa na Dear Mr. Lonely, nag alingawngaw sa kahaharongan sa Ciudad maging sa mga harayong baryo kun kaya, iyo idto an saro nagtatao nin inspirasyon sa mga bikolano ninhuli sa mga surat nin pag kamoot asin magayon na advice ni Kuya Ed. Haros sinakong surat an nag aabot ki Ed, mga surat na iguang lalog nin kwarta ta sinda naghahagad nin retrato kan saindang idolo. Sakuyang ikinaag sa kolum na ini an istorya ni Ed de la Rosa, ninhuli ta padagos akong nakakaresibe nin mga kahapotan hale sa saiyang mga tagahanga, na naghahapot kun yaon sain na daa si Mr. Lonely. Si Ed de la Rosa, afuera sa pagiging announcer, siya nagretiro bilang sarong halangkaw na opisyal kan DAR Camarines Sur asin sa saindang pag retiro, nag migrate sinda sa America. An pagkamoot ni Ed sa Bicol, dai nanggad nahahale sa saiyang puso, kun kaya ngonian na Penafrancia Fiesta, si Mr. Lonely nagpuli asin ngonian nakatener sa saindang residencia sa Tibgao, sa banwaan nin Canaman. Nakakamundong pag isipon na sa butwa kan Computer generation asin, nawara na an mga love asin letter reading sa radyo na sarong bulawan na memorya nin mga paradangog kaidto sa AM radio.