Debosyon

Kumusta ang nakaaging Peñafrancia Fiesta para saindo? Ano lamang si handa? Nakapirang harong kamo nin paki-dula. Ang aldaw nin kapistahan pirming ikatolong Domingo kan Setyembre, pakatapos kan “sakay” o Fluvial Procession ni Ina. Sa tradisyon, naging duwang aldaw ang celebracion, ang aldaw na Sabado, kung saen hale si Ina, asin ang aktwal na solemnidad, aldaw nin Domingo, kung saen nagbalik si Ina, sa Peñafrancia Basilica Minore, ang saiyang harong. Kaya pag sa ka-centrohan kan ciudad, Sabado. Sa Francia, Balatas, Magsaysay, kadaklan Domingo. Sa ngonian dai naman ini nasusunod na maray, kung ano ang conveniente saka kung noarin ang imbitar, iyo yan ang schedule kan celebracion.

Medio haloy kong nanudan na duwang debosyon asin duwang Fiesta palan ang pinagce-celebrar ta kada Setyembre, ang fiesta kan Divino Rostro na ang aldaw nin kapistahan iyo ang taunan tang Traslacion na kung saen kaiba na si Ina pasiring sa Catedral kung saen mapoon ang novenario para sa saiyang kapistahan o solemnidad na iyo ang sunod na Domingo.

Ang eksperiyensiya ko kan celebracion kan kapistahan parte kan debosyon na kinadakulaan ko na, saro man akong voyador. Kung tama ang sakong memoria, first year high school ako nagpoon mag-voya ta nahiling ko ang gaweng ini sa sakuyang ama asin mga tiyoon. Ano ang lohika o rason na maki-susoan asin makakapot sa andas ni Ina asin Divino Rostro na may mga aldaw na puede ka man mag-directa na sana pag ordinaryong aldaw? Ano ta makikiagawan pa man ang taga-Naga man o taga-Bicol naman na haman?

Dai ko aram ang simbag. Iba-iba man na paagi ang pagpahayag kan satong debosyon. Ang masasabi ko sana, segun sa sakong ekperiyensiya, ang pagdulok asin pagkapot sa andas nin may dikit na kasakitan nin pakisusoan nagpapagiromdom sako na ang pagpangadie may halong dikit na kakulitan, siring sa pagkulit nin aki sa saiyang ina o mga magurang. Sabi sa mga nadangog sa sermon, aram man kan Dios ang satong mga kahagadan pero nakakatabang kung may kaibang lambing asin dikit na kulit. Personal na maray para sako ang debosyon asin aram ko iyo man ang kaso para sa ibang deboto.

Tanda ko kadto, may sarong taon na ang iniba sa sakay sa pagoda kan fluvial procession mga paraoma asin parasira. Sa trabaho ko bilang parte kan sektor kan agrikultura, naobserbaran ko ang makusog na debosyon kan satong mga paraoma asin parasira. Ang pag-oma o pag-sisira mga kabuhayan na pano nin mga bagay na mayo kitang control arog kan panahon o klima, ang kapalibutan, o ekonomiya.

Dakul paraomang asin mga parasirang voyador. Ang mga parasira kan ciudad, kaibahan sa taon-taon na regatta asin kaibahan sa pagbutong kan pagoda kung saen nakasakay si Divino Rostro asin Ina.

Madadangog minsan sa saindang mga istoria na dai malingaw magpangadie asin magpasalamat sa biyaya asin hagadon na maparayo sa peligro, kalamidad asin mga katibaadan. Personal man ang debosyon para sainda. Ini ang inaagihan kan satong mga kakanon sa kada lamesa.

Ang kada fiesta, celebracion nin pagtubod asin pagsarig sa may kagibo. Celebracion nin biyaya asin pagheras kaini. Bako sanang istoria, kundi eksperiyensiya. Garo aroaldaw na hinangos, aroaldaw na pagmuklat nin mata asin pagbangon. Viva La Virgen! Viva El Divino Rostro!