DELUBYO

Tigsik ko kun iguang calamidad

Duwang klase nin tawo minaluwas-

Saro - sa pagtabang minakapagkapag

Duwa - sibotsibot sa pagtabag!

Tigsik ko kun may katibaadan sa mundo

An klase kan tawo parareho

Mayo nin mayaman o tikapo

Gabos makaherak sa oras nin peligro!

An saray na yaman tigsik ko man

Dae madadara sa kalangitan

An marhay na pagkatawo tungkusan

An Kagurangnan diyan ka huhusgaran!

Tigsik ko man ining kagayonan

Bakong sa gabos na oras madanay

Sa panahon yaon ka sa lulubngan

Saro ka nang ulodon na kalansay!

Tigsik ko an kataposan kan kinaban

Nuarin? Mayo pong nag-aaram

Posibleng sa aga o kaya ngonian

Magpuka, magbantay, linigon an buhay!

Tigsik ko an pag-abot kan Delubyo

Mapapaisip kitang mga tawo -

Saen daw maduman ining kalag ko -

Sa Paraiso o sa Impiyerno?