top of page

Dengue case nagbubutwa na naman sa Naga

Nagkapera naman na caso nin dengue sa mga barangay kan Ciudad nin Naga mantang igwa naman nin mga pag-uran na dapat maging andam an mga residentes contra helang na nakukua sa namok na puedeng labanan sa paagi nin kalinigan sa kapalibotan kan harong.

Ini an mga pahayag ni Consejal Sonny Rañola bilang Chairman kan Committee on Health sa Sangguniang Panlungsod kasunod kan naikurit sa City Health Office na nagbubutwa naman an caso kan dengue. Hinagad giraray ni Rañola an kooperasyon kan mga Barangay Health Workers (BHWs) na magtabang sa advocacia para sa kalinigan nganing mayong estaran kan dengue namok.


Sa listahan kan CHO sagcod kan huring bulan nin Hunyo 2023 igwa nang apat na caso sa Barangay Dayangdang; tolo sa Pacol; asin Cararayan apat na caso.


Hinagad kan consejal sa mga residentes kan barangay sa ciudad na mas marhay an parating malinig an saindang kapalibotan nganing mahale an estaran kan namok asin dagos nang magadan. Si mga lata, soro asin iba pa na may tubig dapat palaobon tanganing dai estaran namok.


Kan nakaaging taon 2022 sa listahan kan DOH Bicol an Camarines Sur asin Ciudad nin Naga iyo an may halangkaw na caso kan dengue.


Tanganing dai na mangyari sagcod na igwa pang binabawian nin buhay girumdumon kan cada familia an kapalibotan dapat perming malinig bako lang sa luwas kan saindang harong envez maging sa laog, sabi pa ni Rañola. (DA)


Kommentare


bottom of page