DepEd Bicol kulang diez mil paratukdo, kulang classrooms

Ciudad nin Legazpi --- Nag-aatubang sa pagkulang-kulang nin mga paratukdo asin classrooms an Department of Education sa Bicol mantang si ibang mga raraot na escuelahan huli kan nakaaging calamidad pinaghabol pang pakarhayon sa pagbuelta kan full face-to-face classes kan Noviembre 2022.

An kakulangan nin education infrastructure saro sa pigbuyagyag ni DepEd Secretary asin VP Sara Duterte na kabali sa mga causa sa nagluluyang calidad nin edukasyon sa nasyon.

Sinabi sa Bicol Mail ni Dr. Gilbert Sadsad, regional director kan DepEd sa ngunian labi sa diez mil an kakulangan na paratukdo sa rehiyon poon sa kinder hasta grade 12 mantang dakula pa an saindang kakulangan na classrooms alagad dai niya maitao si exakto numero huli ta kapot kan engineer kan saindang ahencia.

An Bicol igwang maabot sa cinco mil na escuelahan alagad an temporaryong solusyon kan ahencia iyo an ‘‘double shifting of classes’’ nganing gabos makaatendir sa F2F classes.

Dai palang nahahaloy si DepEd Secretary VP Duterte sa saiyang Basic Education report 2023 saiyang inako na nagbaba an calidad kan edukasyon sa nasyon.

Kan mga nakaaging administrasyon nagpalyar na mapaangat an edukasyon sa nasyon alagad sa presenting administrasyon ni Sec Duterte naggigibo na nin mga plano nganing mas mapaangat an calidad sa edukasyon.

Saro sa mga naheheling na napabayaan iyo an kakulangan nin education infrastructure, learning resources, mantang saro pa sa nasambitan kan DepEd Secretary na ‘‘overworked asin underpaid an paratukdo na naresulta an mga estudiantes iyo an apektado.

An assessment sa sistema kan edukasyon asin findings na pigpresentar ni VP Duterte haros bako nang bago mala ngani dati nang pigbuyagyag sa survey kan Word Bank, na an satong nasyon saro sa mga may pinakalangkaw na rate sa ‘‘learning poverty’’ sa East Asia asin Pacific region.

Sa mga pahayag kan ibang opisyal kan DepEd sa rehiyon saro sa nakaapektar sa education system kan nasyon iyo an pandemya na inabot nin duwang taon sagcod na nag-implementar nalang nin modular learning maging problema pagtios kan familia asin luway-luway nang nagbabalik an calidad sa pagbalik kan face-to-face classes. (dpa)