DepEd kan Camarines Norte andam sa face-to-face classes

Daet, Camarines Norte --- Preparado na sa plano an Department of Education (DepEd) kan Camarines Norte sa 137 mga escuelas publica para sa face-to-face classes alagad kaipuhan man giraray an pag-aprubar kan saindang opisina central.


An Camarines Norte bibihira an caso kan coronavirus disease (Covid-19) mantang mahiwas an mga escuelahan na dai apektado kan virus an mga barangay.


Alagad sinabi ni School Division Superintendent Nympha Guemo, sinda nag-andam kan listahan kan mga escuelahan na igwa nang kaandaman sa pagbuelta kan face-to-face classes kasunod kan kasugoan ni Secretary Leonor Briones na magsumiter an gabos na mga escuelas publica kan posibleng lugar na dapat ipadagos na an pagbuelta sa classroom kan mga estudiante.


Ipapasunod sana an estrictong health and safety protocols kan DepEd.


Nakakaulang sana an paglangkaw naman kan caso kan virus alagad an Camarines Norte saro sa anom na provincia kan Bicol na may hababang caso mala ngani igwa sanang maabot sa 560 kumpara sa Camarines Sur na igwa nang labi sa cinco mil na caso asin sa Albay igwa nang maabot sa 2,500 na caso.


Dai pa maderminaran kan DepEd Bicol kun nuarin mapaluwas nin directiva si Secretary Briones na ipadagos an limitadong face-to-face classes sa mga piling lugar.


Kan nakaaging semana sinuspende kan DepEd kan Camarines Norte an pag-distribuer kan mga modular sa mga estudiante asin paratukdo nganing makaibitaran sa ulakit kan virus.