DepEd nag-aandam sa expanded classes

Puponan na kan Department of Education (DepEd) Bicol an limited pilot face-to-face-classes (F2F) sa Noviembre 22 alagad si mga dai kaayon digdi pig-aandaman kan dakul nang mga escuelas publica an maparticipar sa expanded classes mantang hahalaton an resulta kan pilot F2F.


Sa pigtalaan na limitadong physical classes siyam sanang mga escuelahan sa Bicol an kabale hale sa mga ciudades kan Ligao asin Masbate asin sa Sorsogon, Sorsogon, sabi ni regional director Gilbert Sadsad.


An LGUs asin magurang sa sinambit na lugar an nagsusuporta sa pagbuelta kan limited pilot F2F classes na nagdesisyon an DepEd ibale sinda sa burukasan nin klase sa Noviembre 22.


An DepEd naglalaom na mabuelta na sa mga regular classes alagad an gobierno nagdedepende sa caso sa virus.


Saiyang sinabi na sa Camarines Sur igwang sampolong mga escuelahan sa elementarya nag-aandam na kan F2F classes na an mga barangay mayong caso sa coronavirus disease alagad dai muna nag-pabor an opisyales lokal huli sa halangkaw an caso kan Covid-19 sa provincia.


Ini naghahale sa mga banwaan kan Sipocot, Ragay, Del Gallego asin sa Ciudad nin Naga alagad kulang sa suporta kan LGUs asin magurang ta nahahandal pa sa deadly virus.


An pinakahuring nagbawi iyo an suporta kan lokal na gobierno sa Ciudad nin Iriga na naging dahilan cancelarong si nakatalaan na face-to-face classes sa sarong elementary school digdi.


Alagad saindang pig-aandaman an expanded classes na piglalaoman suportado na kan LGUs maging kan Parent Teachers Association na yaon na sa plano kan mga DepEd School Division Superintendent sa Bicol.


Sa Ciudad nin Naga, si School Division Superintendent Manny De Guzman nagpahayag pasiring na sinda sa preparasyon sa expanded classes kun dai nakabale sinda sa F2F classes.


An mga guidelines sa pagsikad kan expanded classes dai man magrarayo sa F2F kabale na an pagsunod sa mga health and standard protocols.


Sa rekisitos kan DepEd national office nganing makaparticipar sa F2F classes dapat 28 diyas antes kan pagbuelta sa classroom an klase dapat zero sa caso sa Covid-19 an barangay asin an escuelahan pacil sa transportsyon an mga estudiantes. (DPAureus)