DepEd Naga dai pasado sa pagbwelta kan F2F classes

Nagtugot na si Presidente Rodrigo Duterte sa Department of Education (DepEd) sa pagbuelta kan pilot face-to-face classes ngunian na school year 2021-2022, alagad sa Ciudad nin Naga mayong pasadong escuelahan dawa sa basic requirement pa sana.

An dahilan huli ta an gabos na 27 mga barangay kan ciudad apektado na sa padagos na paglangkaw sa caso kan coronavirus disease.


Ini an kinumfirmar sa Bicol Mail sa entrevista sa telepono ki Naga City School Division Superintendent Manny De Guzman mantang igwa na sinda nin guidelines hale sa DepEd central office nganing basehan sa pagbuelta kan mga estudiante sa F2F classes.


Kun dati igwang tolong mga elementary school sa barangay kan Panicuason, San Isidro asin an pinakahuri sa brgy. Carolina alagad kan magbutwa an delta variant case sa Ciudad nin Naga nagkaigwa na nin caso an barangay.


An Teodora Moscoso Elementary School sa brgy. Carolina iyo si nawalat na pigrecomendar sa physical classes ngunian na burokasan nin klase alagad sa pinakahuring datus kan caso kan Covid-19 sa ciudad igwa na nin caso sa brgy.


An barangay Carolina, ipinahayag na igwa pang nagkaperang active case alagad an Teodora Moscoso Elementary School enot nang pigsumiter bilang candidato sa F2F asin an problema ngunian apektado na kan caso sa virus.

An Ciudad nin Naga igwang maabot sa 50 public schools asin an instruksyon kan central office kun an sarong escuelahan pigsumiter bilang candidato kun dai na makaka-pasar kaipuhan sa mga masunod na aldaw tabangan na makumpleto an gabos na rekisitos, alagad sa ciudad masakit pang macontrol an virus.


Sinabi ni De Guzman sa pinadarang guidelines hale sa central office sa duwang basic requirement pa sana dawa dai na magheling sa halabang checklist dai na pasado an arin man na public school sa ciudad.


Sa sinambit na rekisitos an duwa kinababalehan na dapat sa laog nin 28 diyas zero sa Covid-19 an barangay asin sa ika-duwa dapat madale an transportasyon.


Nagkaperang mga congresista, gobernador maging senador asin si Bise Presidente Leni Robredo nang nagrerecomendar na dapat ibuelta na an physical classes sa mga barangay na mayong caso kan Covid-19. (DPAureus)