DepEd Naga kumpleto sa mga volunteer tutor

Igwa nang mga volunteer tutor an Department of Education (DepEd) sa Ciudad nin Naga na dakulang bagay nganing makatabang sa programa sa pagbasa kan ahencia na inaapod ‘‘Brigada Pagasa’’ nganing mahasa sa pagbasa an mga estudiante sa escuelas publica sa tahaw kan dai pa tinutugot an face-to-face classes.


Si City School Division Superintendent Manny de Guzman nagpahayag an programa piglansar na sa opisina rehiyonal kan DepEd Bicol bilang suporta sa proyekto sa 3Bs advocacy o ‘‘Bawat Bata Bumabasa’’ na kaayon sa programa kan opisina sentral, alagad digdi sa Bicol mas pinalawig ni Director Gilbert Sadsad asin ginibo nang 5Bs: Bawat Batang Bikolano Bihasang Bumabasa’’.


An mga volunteer tutors kinababalehan kan retiradong paratukdo, igwang mga professionals, nagtapos sa colegio alagad mayo pang trabajo, mga aplikanteng paratukdo asin kabale na sa grupo si magurang o tugang.


Ngunian na panahon kan pandemya apektado an pag-adal na daing gayo natututokan kan paratukdo mantang mayo pang face-to-face classes asin an programa sa Brigadang Pagbasa makakahasa sa mga Bikolanong nag-aaradal, sabi pa kan DepEd Naga.


An volunteer puedeng magpili kun anong subject an saindang itutukdo, depende sa itataong assignment kan escuelahan.


Nagpasalamat man si de Guzman sa mga volunteer sa padagos na pagsuporta sa DepEd sa tahaw kan inaatubang na kadificilan ngunian huli kan pandemya.


Dinagdag pa na an gabos na volunteer readers nakatalaan tawan nin certificate of recognition o appreciation, mantang an volunteer tutors marecibe nin certificate of teaching experience na magagamit orog na sa mga aplikanteng paratukdo.


Piglinaw kan DepEd Naga na mayong ‘‘honorarium’’ itatao an ahencia alagad igwa pigtaong mga resources kit.


Dai pa makataong bulan asin petsa an DepEd kun nuarin an burokasan nin klase mantang dai kumfirmado si enot na nagluwas na report sa Agosto 24 o Septiembre 2021.


Sagcod sa ngunian an saindang opisina sentral mayo pang desisyon kun ibubuelta na an F2F classes sa school year 2021-2022. (dpa)