DepEd Naga masabay na sa expanded classes

Iginilid kan City School Division kan Department of Education (DepEd) sa Ciudad nin Naga na igwang makaayon dawa sarong escuelahan sa face-to-face classes na nagpuon kan Noviembre 15 envez saindang aandaman an expanded classes alagad kaipuhan an suporta kan lokal na gobierno.


Si Dr. Manny De Guzman, pamayo kan DepEd Naga nagpahayag kun nagparticipar sinda sa pagsikad kan face-to-face classes an puedeng ikunsiderar iyo an Teodora Moscoso Elementary School sa Barangay Carolina.


Perang bulan na mayong caso sa coronavirus disease alagad kan mag-anuncio an saindang national office sa pilot face-to-face classes nagkaigwang caso sa sinambit na barangay mantang naglalangkaw man kaidto si caso sa virus sa ciudad.


Huli kaini, saindang sinibog si recomendasyon sa DepEd na magkaigwang F2F classes sa ciudad dawa sarong elementary school.


An saindang pig-aandaman iyo an expanded classes na iimplementar alagad hahalaton muna nin perang bulan an resulta kan in- person classes.


Sinabi pa ni De Guzman na dai man na-iiba an guidelines kan DepEd nganing an sarong escuelahan makabale sa expanded classes. An duwang enot na dapat mapasaran dapat mayong caso kan Covid-19 kun nagkaigwa man dapat pakatapos nin 28 diyas asin an transportasyon daing problema sa mga estudiantes an viaje.


Kun pasado na sa enot na duwang basic requirements dapat suportado kan LGU asin magurang asin sa listahan kan DepEd igwang 200 gabos an dapat masunod alagad ini puedeng marealisar sa pagtarabangan kan escuelahan, LGU asin magurang, sabi pa kan opisyal kan DepEd Naga.


Sa survey sa Ciudad nin Naga, 95 por ciento an nagpapabor para sa pag-atendir sa online classes alagad igwa man giraray modular learners, kabale digdi an radyo asin television.


An expanded classes dai man na-iiba sa F2F classes na kaipuhan magsunod man giraray sa health and safety protocols.


Nagpuon an enot na aldaw na F2F classes siyam sanang elementary school sa Bicol an nakaayon hale sa Ciudad nin Ligao, Ciudad nin Masbate asin man Sorsogon City.


Sa Camarines Sur igwang sampolong pigrecomendar sa DepEd Bicol alagad sinibog mantang limitado sana an numero kan mga escuelahan para sa pagbuelta sa physical classes. (dpa)