DepEd Naga nagbilog na kan CLF
An Department of Education (DepEd) sa Ciudad nin Naga nag-adaptar na kan Community Learning Facilities (CLF) nganing matabangan an mga escuela puon sa kindergarten hasta grade III na an saindang magurang mayong kakayahan o panahon para matukdoan an saindang mga aki sa pag-adal kan leksyon sa klase nin huli kan kawaran nin face-to-face classes.
Si DepEd Division Superintendent Manny de Guzman nagpahayag sa Bicol Mail ini saindang iimplementar sa masunod na semana ngunian na Febrero 2021 alagad an saindang pigkuang Learning Support Teachers (LST) na hale sa mga calificadong aplicanteng paratukdo ididistribuer sa 29 escuelas publica sa ciudad.
Nagtapos muna sinda sa mga orientation seminar kan DepEd antes idestino sa mga escuelahan nganing preparado na kan saindang trabajo.
An saindang pagtukdo sa paagi nin cellphone o internet na kakaulayon an estudiante na mayong nagtatabang na magurang sa saindang pag-adal sa aroaldaw na mga leksyon.
An programang ini kan DepEd Naga kasunod man kan pinaluwas na DepEd Order Number 32, series of 2020 alagad an prioridad na mga estudiantes na dapat matabangan sa saindang pag-adal orog na kun an saindang magurang dai man nakatapos sa pag-adal o mayong panahon huli ta may trabajo an magurang.
An learning support teachers bakong permante asin an saindang sueldo base sa pinakahuring minimum wage order kan Regional Tripartite Wages and Productivity Board kan Department of Labor and Employment (DOLE).
An fondo maghahale sa Special Education Fund kan City Hall na aprubado na ni Alcalde Nelson Legacion.
An LST dakulang bagay ngunian na pandemya sa mga mayong trabajo asin sinda si dai nakuang calificadong aplicanteng paratukdo puede pang dugangan kun kinakaipuhan depende sa fondo kan ciudad.
An school year 2021-22 matapos sa Hunyo 11, 2021. (dpa)