DepEd preparado na sa burokasan klase sa Aug 29

Preparado na an Departamento de Edukasyon (DepEd) sa Kabikolan sa burokasan nin klase sa Agosto 29, para sa school year 2023-2024 sa piglalaoman labi sa 1.5 milyon na estudiantes na nagpalista poon sa kindergarten, elementarya asin segundarya.

Sinabi ni DepEd Regional Director Gilbert Sadsad kun kulangan nin mga classroom sa ibang mga escuelahan pampuliko igwa na sindang plano nganing iimplementar sa enot na aldaw kan klase.

Saro sa may halangkaw na numero nin enrolees iyo an Camarines Sur National High School sa Ciudad nin Naga na inaabot sa doce mil na populasyon.

Igwa nang mga ginibong paghirahay sa mga classroom na naraot huli kan mga nakaaging calamidad.

An kaandaman sa burokasan nin klase kasunod man kan mga ginibong Brigada Eskwela na pigparticiparan kan mga paratukdo, magurang asin stakeholders.

Pasalamat an director sa mga nagtabang asin nagsuporta sa nagtapos na sa sarong semanang Brigada Eskwela para sa kaandaman sa burokasan nin klase.

Sa lado kan Philippine National Police si regional director PBGen Westrimundo Obinque nagpahayag na nagpaluwas na siya nin directiva sa mga Provincial Director sagcod sa mga Municipal Police Station na magwarak nin kapupulisan sa mga escuelahan nganing maseguro an paz y orden.

Kabali sa lugar na dapat may nagpapatrolyang awtoridad sa mga vicinidad kan escuelahan asin mamantenir kan trafico.