DESISYON KAN DENR HINAHALAT: 67 poon nin Acacia tree pigrecomendar purotolon

67 mga poon nin Acacia tree sa mga gilid nin tinampo kan Ciudad nin Naga, pigrerecomendar kan ENRO kan City Hall sa Department of Environment and Natural Resources (DENR) na dapat purotolon na mantang matatapo sagcod na delicado nang matumba kun makusog an duros siring kan nangyaring trahedya sa Ocampo, Camarines Sur asin Ciudad nin Legazpi.

An mga poon nin kahoy yaon sa mga barangay kan San Felipe, Cararayan, Pacol, San Isidro, asin Concepcion Grande, sabi ni Acting Chief Marvin Sagun kan ENRO kan lokal na gobierno kan ciudad.

Hinahalat nalang kan ENRO an approval kan DENR nganing iimplementar an pagpurotol kan matatapo nang acacia tree.

An aksyon na ini kan City Hall kasunod kan instruksyon ni Alcalde Atty. Leni Robredo na ma-inspeksyon tolos an kamugtakan o kondisyon kan mga kahoy sa gilid nin tinampo nganing makaibitaran sa ano man na aksidente asin buwis nin buhay kan tawo.

Antes kan saindang rekomendasyon nag-inspeksyon ngona kan mga poon nin kahoy sa gilid kan tinampo alagad nareparo ninda na kadakli igua nang labot an poon kan darakulang kahoy na mapeligro nang matumpa bako lang kun iguang calamidad maging kun makusog an duros.

Si nangyaring dai palang nahahaloy na aksidente sa Barangay Moriones, Ocampo na duwang magtugang an binawian buhay asin saro sa Ciudad nin Legazpi apesar na mayo man bagyo envez huli sa makusog na duros.

Igua nang enot na nangyari sa ciudad kan matumbahan nin poon nin kahoy an kotse na nilulunadan nin duwang opisyales kan City Hall marhay ngani ta nairedo sana asin nakasalbar si buhay.