DESISYON KAN OMBUDSMAN: Ex-consejal kan LGU binawalan na magpugol nin puesto sa gobierno

Sarong dating consejal asin nag-acting mayor sa Pili, Camarines Sur discalificado nang magdalagan sa ano man na puesto elihido asin magpugol nin ano man na posisyon sa gobierno sa pinaluwas na desisyon kan Ombudsman huli sa caso administrativo asin pinapasangatan pa nin caso kriminal sa jusgado.


Sa binabang desisyon kan Ombudsman petsado Oktubre 13, 2020 alagad narecibe sana kan complainant na si barangay kagawad David Olaguera kan New San Roque, Pili, CSur kan Hulyo 19, 2021 an respondiente iyo si dating Consejal Raul Delfin Lim Divinagracia (SG 24) na nagtukaw acting mayor kinastigo nin perpetual disqualification sa ano man na puesto sa gobierno asin huli ta bako nang incumbent councilor pinapauli sa gobierno an sarong taong niyang nakubrang sueldo.


Naging ugat kan caso iyo an pagbugtak nin sadiring bulangan na PSAAC, barangay Anayan apesar na incumbent councilor asin Chairman kan Committee on Games and Amusement kan Sangguniang Bayan.


Dai paman makuanan nin reaksyon an respondiente alagad pigtutubodan na masangat pa nin motion for reconsideration sa naging desisyon kan Ombudsman.


Naging alegasyon kan consejal na nagdemiter na siya sa sinambit na komite, binalyo sa bagong pagrurogaring asin permit and franchise kan PSAAC kan Hulyo 14, 2018.


An desisyon naprubaran asin igwang evidencia sa caso administrativo ‘‘for Grave Misconduct Prejudicial to the Best Interest of the Service’’, pirmado ninda Graft Investigation and Prosecutor Officer III Gaudencio Rafael M. Manalac asin Deputy Ombudsman for Luzon Cornelio L. Somido. (dpa)