Desisyon kan SC paso na, sabi

Sinisikwal kan nagcacandidatong alcalde Fortunato ‘‘Tato’’ Mendoza an alegasyon kan taohan ni Henry Rodriguez, iredero ni Don Hermogenes Rodriguez na si Teofilo Tandaan an pigbabasehan kan ‘‘claimants’’ sa pagprubar na mag-take over sa saiyang propriedad kan Deciembre 24, 2021 iyo an desisyon kan Corte Suprema Numerado 182645 envez dapat mag-presentar sinda nin titulo.

Tapos na an duwang taon na ‘‘prescribed period’’ an saindang propriedad sa barangay Triangulo kumpleto nin mga dokumentos siring kan titulo asin tax clearance mantang regular an saindang pagbayad nin buwis sa gobierno, sabi ni Mendoza.


An desisyon kan SC pinapaheling kan nagpapabistong taohan ni Rodriguez na si Teofilo Tandaan sa tarpaulin sa saindang kinudalan na propriedad sa Brgy. Triangulo ninda Engr. Ben Sia, Robert Obiedo asin iba pang negosyante na iyo an saindang na-take over kan nagpalyar makalaog sa propriedad ni Mendonza.


Afuera pa kaini, an naenot na desisyon kan Regional Trial Court Branch 34 kan Ciudad nin Iriga sa isyu sa ‘‘heirship’’ kan dipuntong Hermogenes Rodriguez, etc. kan taong pang 2006.


Sinabi pa ni Mendoza kun talagang sainda an propriedad dapat mag-file sa corte nin petisyon na kanselaron an saindang titulo bakong paagihon sa fuersa kaibanan an dibadilan na mga security guard nganing kurudalan an mga propriedad kan negosyante na pigsasabi kabale sa 72 hektarya na pagrurugaring kan iredero Henry Rodriguez.


Si Obiedo nagpahayag na milyones pesos an pigbabayad niya sa buwis sa propriedad real alagad bigla lang na lalaogon kan ibang grupo apesar na igwa sindang pugol na titulo.


An sinambit na mga propriedad nin negosyante pigkudalan kan Deciembre 29, 2021, alagad an mga apektado nag-rereclamo sa Naga City Police Office pinabuelong magkurudal apesar na mayong fencing permit na dapat pig-isyu kan City Engineer’s Office kan City Hall.


Si Atty. Reynaldo Herrera, Legal Counsel kan iredero na si Henry Rodriguez nagsurat sa City Hall na naka-address ki Alcalde Nelson Legacion, City Director Marlon Catan kan NCPO, Brgy. Capt. Allan Beriso asin City Engr. Alexandar Caning na petsado Noviembre 6, 2021 na nag-iinformar na makudal sinda sa 72 hektarya lote sa barangay Triangulo, Ciudad nin Naga nganing magbugtak nin ‘‘barb wire fence’’.


Alagad piglinaw ni Engr. Caning an surat na saindang narecibe kan Noviembre 15, 2021 dai man macoconsiderar na fencing permit mantang dapat magsunod sinda sa rekisitos kan building code. (dpa)