Desisyon sa wage increase ipapaluwas sa Hunyo-RTWPB

An Regional Tripartite Wages and Productivity Board (RTWPB) sa Bicol mapaluwas kan saindang resolusyon sa laog kan bulan nin Hunyo 2022 sa petisyon kan grupo nin obreros na minimum wage increase sa rehiyon cinco sa aldiya Php750.00.

Alagad an grupo nin negosyante o pribadong sektor nanindugan contra sa petisyon kan grupo nin obreros nin huli ta nakakahawas palang sinda sa pagkalugi epekto kan pandemya mantang an iba nagsabi na mapabor sinda sa wage increase alagad dapat haleon na kan gobierno an dakulang buwis na saindang binabayad.

Si director Ma. Zenaida Angara-Campita, direktor rehiyonal kan Department of Labor and Employment (DOLE) saka Chairman kan RTWPB nagpahayag natapos na an saindang mga public hearing sa petisyon sa dugang na sueldo kan Abril 26 asin Abril 28, ngunian na taon alagad hahalaton ninda pakatapos kan eleksyon magpaluwas nin desisyon.

Ini kasunod kan petisyon sa wage adjustment na pigplantiar kan Marso 22, 2022 kan Solidarity of Unions in the Philippines for Empowerment and Reforms (SUPER) na pigrepresentaran ni Efren Cas na may address sa BMP-Camarines Norte na saindang hinahagad an wage increase sa rehiyon sa Php750.00 na aldiya.

Ginibo an saindang mga public hearing sa private sector workers para sa Camarines Sur asin Camarines Norte kan Abril 26, 2022 sa Avenue Plaze Hotel, Magsaysay Avenue, Ciudad nin Naga kan Abril 28, 2022 sa Convention Center sa Ciudad nin Legazpi.

Sa magkasuhay na mga public hearing sa Camarines Sur asin Albay kun igwa man nagpapabor hale sa presenting minimum wage na Php310 gibohon sanang Php360 o dugang na Php50.00.

Alagad an representante kan labor sector nanindugan na an dugang na sueldo magiging kasimbagan sa sunod-sunod na paglangkaw kan presyo nin petrolyo nganing makabangon sa padagos na pagtios an mga obrero. Bako sanang produkto nin petrolyo envez maging an mga prime commodities padagos an paglangkaw kan presyo dai man napupugolan kan DTI,

An petisyon sa sakop an anom na mga provincia sa Bicol na kinakabalehan kan Camarines Norte, Camarines Sur, Albay, Sorsogon, Masbate asin Catanduanes.

Sa lado kan domestic workers kabale paman sa pig-urulayan sa mga public hearing.

An RTWPB compuesto kan DOLE, representante kan business sector, labor sector, Department of Trade and Industry asin National Economic Development Authority. (dpa)