Dialysis Center ibubugtak sa bagong Naga City Hospital

Mabugtak nin sadiring Dialysis Center sa pinapatukdok na bagong Naga City Hospital (NCH) sa barangay Balatas nganing matabangan an mga taga ciudad na makatipid sa gastos kumpara sa pribadong clinic.

Ini matapos ma-aprubaran sa sesyon regular kan Sangguniang Panlungsod an ordinansa na pigpanday ni Consejal Sonny Rañola na nagtatagama nin P20 milyones matapos enot nang maaprubaran sa Committee on Health na saiyang pinamamayohan.

Sinabi ni Rañola saiyang pigtulod an pagbugtak nin DC sa bagong city hospital nganing makumpleto an mga laboratory kan hospital asin kumpurtable pa sa mga pasyente an lugar.

Inaprubaran an fondo nganing pagbukas kan hospital igwa nang facilidad sa dialyses center asin dai na maghalat nin panahon.

Sa ngunian, sinabi pa ni Rañola nagpapadagos na an kontruksyon kan bagong edificio kan hospital na an fondo nagcacantidad nin P350 milyones hale sa inutang na fondo sa bangko kan lokal na gobierno.

Siya iyo an padreno kan ordinansa kan nakaagi pang administrasyon lokal alagad dakulang bagay na napupunan na an proyecto asin igwa nang piglalaoman an mga taga Naga nin bagong NCH.

Mas mahiwas sa presenting City Hospital sa Peñafrancia Avenue na labi sanang veinteng pasyente an bed capacity kumpara sa bagong hospital na kayang ilaog an 200 bed capacity.

Si Rañola iyo man an responsable na madugangan nin laboratoryo siring kan ultra sound asin iba pa an presenting lomang city hospital. (dpa)