Digital startup challenge pigbosol kan LGU-Naga sa paagi kan ‘Blast Off’

Ki Jason B. Neola

Dugangan an kolor asin pakusogon an buhay kan mga negosyo na imbwelto sa digital innovation asin enkaminaron an iba pa tanganing magrambong an numero kan siring na negosyo dawa yaon sa panahon nin pandemya.

Ini an mensahe kan piggibong digital startup challenge kan lokal na gobierno kan ciudad nin Naga na nagtao nin dalan sa pitong negosyantes na pig-aapod mga innovators na nakatalaan makakoa nin fundo hale sa LGU Naga kaibahan na an paghaman nin partnership sa nasambit na gobierno lokal.

An mga negosyante pigaapod mga innovators huli ta an saindang mga negosyo minadara nin innovation paghali sa tradisyunal na paagi nin pagnenegosyo pasiring sa digital, boot sabihon naggagamit nin modernong paagi sa pagbenta siring kan apps.

Kan Disyembre 14, ngonian na taon, pigpadrenuhan kan LGU Naga an primerong digital startup challenge sa paagi kan Blast Off project na igwang katuyuhan mag-enkaminar nin iba pang negosyantes na magin innovators asin maheling an oportunidad na mapaasenso pa an sistema nin siring na pagnegosyo gamit an digital apps.

Sa ginibong challenge pitong innovators an natawan nin pagkakataon na magrecibe nin funding commitment gikan sa LGU Naga, sinda iyo an mga minasunod: Beshie, Besty, Innove Prime Solutions, Inc., MavenHands Co, Nueca Technologies, Inc. Pandelivery, asin Run:Coco.

An startup challenge asin pitching session kan Naga iyo an pinakaprimerong piggibo sa Pilipinas na nagkaigwa nin katorceng qualifiers gikan sa Naga asin iba pang lugar kan nacion na yaon sa lado nin e-commerce, logistics, asin delivery, govtech, education, asin health.

An Blast Off sarong nangengenot na proyekto kan LGU Naga na pigbobosol kan Startup Development Committee kan Naga City Investment Board.