Dinastiya kontra mga dinastiya sa Cam. Sur



Nin huli ta makusog, pusog, asin paldo an administrasyon sa provincia nin Camarines Sur an oposisyon medyo desperado sa paghanap nin makusog na kalaban kan pigbabandera kan pamilya Villafuerte na iyo an pambato para gobernador sa 2022: an juvenon pang si Luigi R. Villafuerte, aki ni dating congressman asin gobernador LRay. Makuapo pa ni dating gobernador Luis R. Villafuerte Sr., asin tugang ni incumbent Gov. Miguel Luis “Migs” R. Villafuerte.


Kaya an oposisyon na anas man ngani may kanya-kanyang dinastiya sa saindang distrito arog ki dating congressman Rolando “Nonoy” Andaya Jr., asin incumbent congressman Arnie Buquid Fuentebella.


An mas dakulang dinastiya kan mga Villafuerte sa enterong limang distrito kan Camarines Sur gustong rumpagon kaining saradit na dinastiya sa Partido area asin sa 1st district kan Camarines Sur.


Kan nakaaguing eleksyon kan 2019 iru-ilaga na kuta na manggana si Andaya para gobernador laban ki Migs alagad mantang gana siyang tig-dirikit magpoon sa 3rd district, sa 4th district o sa Partido, sa sadit niyang primer distrito pati sa 2nd district na an congressman si Lray pero dakulaon si baya saiya sa Rinconada area o 5th district, an pinkadakulang distrito sa Camarines Sur.


Resumidas cuentas: gana si Migs, daog si Andaya para gobernador.


Kaya an pighuhuna kan kadaklan si Andaya man giraray an masabat sa mga Villafuerte ngonyan na eleksyon ta garo puede nang ganahon kan dating DBM Secretary asin aki kadtong depuntong congressman Rolando Andaya Sr. na naguin pinakahalawig na chairman kan Appropriations Committee sa Camara Baja sa estorya kan congreso kan Pilipinas.


Si Nonoy Andaya bistado na nagluklok ki dating congressman asin dating Presidente Gloria Macapagal Arroyo para House Speaker kan 2016.


Kun sa cuarta dai puedeng menuson an mga Andaya pati mga paryentes kaini arog kan Seṅar, Ramos sa Ragay asin sa Magarao. Siya pati an enot na congressman kan 2016 na nag-endorsar ki Mayor Duterte para Presidente. Kaya lang naimbuelto siya sa pigsasahutan na grupo kan mga deputado na nag-abala kan national budget kan 2020 na naka-irita ki Digong.


Si kadto DBM Sercretary Benjamin Diokno na hali sa gabinete pero kinoronahan kan Presidente bilang gobernador kan Banko Sentral.


Alagad huli ta si Andaya nakadukot ki GMA na nakadukot man ki Duterte kakampi man giraray siya kan Duterte administration.


Dai pa piglalaoman na magagadan an saiyang agom na si depuntang Cong. Marissa Andaya. Sa 1st district giraray siya madalagan para congressman.


Sa balyong lado, an mga Villafuerte maski kan 2016 dai pa naka-iba sa pambato kan Mindanao na nagpaluhod sa Partido Liberal asin kan oposisyon kan 2016 presidential election, pero kan manggana na si Duterte bigla nang nagbirik an tambod. Dai man sinda nag-iba sa majority party arog ki dating Speaker Sonny Belmonte na ama ni Quezon City Mayor Joy Belmonte.


Pero nagdukot sinda sa Partido Nacionalista ni dating Senador Manuel Villar asin Senadora Cynthia Villar patin DPWH Secretary Mark Villar, pinakamayayaman sa nasyon ngonyan, dating Senador Bongbong Marcos, Senadora Imee Marcos, Cong. Imelda Marcos asin sa pamilya Cayetano sa pangengenot ni Ex-Speaker Allan Peter Cayetano asin Senadora Pia Cayetano.


Si Sen. Bongbong Marcos kan siya an chairman kan local government committee sa senado iyo an responsable sa pag-ulang kan mga plano kan mga Fuentebella na mabanga an provincia na maguin nang duwa, an 1st, 2nd and 3rd districts saro man na provincia asin an kabanga iyo an 4th saka 5th, Rinconada asin Partido, kaya lang mayong nangyari kaidto. Buking an mga Fuentebella.


Kaya an Camarines Sur iyo man giraray an pinakadakulang provincia sa Kabikolan, may 35ng banwaan, sarong ciudad na iyo an Iriga. An Naga chartered City kaya dai nagboboto sa Camarines Sur poon pa kan 1948.


Hapot: makumbinser daw si VP Leni Robredo na taga- Naga na magkandidatong gobernadora sa Camarines Sur? Magrehesitro daw siya hali sa Naga pasiring sa Canaman o Calabanga o Pili tanganing mag-calificar bilang botante asin kandidato sa provincia nin Camarines Sur. Tugutan daw siya kan Partido Liberal na magbaba nin kandidatura hali sa presidente pasiring sa paguiguin gobernadora sana.


En caso tugutan, siisay man an iriribay saiya?


Magtumang daw si Leni sa pamilya Villafuerte ta si Uncle Luis iyo an ninong ninda sa kasal ni Mayor Jesse M. Robredo, iyo an nagbugtak ki Jesse para director kan Bicol River Basin Development Program asin nagpakandidato ki JMR para alkalde kan Naga pakatapos kan Edsa Revolution.


An pinakadakulang problema ta an kasaraditan kan mga Bikolano hulog na an boot ki Leni na iyo an mag-presidente.


Magana pati kun tatarabangan kan lambang saro sato, kun magkarampanya sa man iba-ibang provincia asin ciudades kan Pilipinas, sa mga Bikolano duman, lalo na sa Metro Manila, sa parteng Northern Luzon, Central Luzon, Calabarzon, Kabisayaan asin Mindanao.


Bako lang sa Facebook an kampanya kundi maggastos, magpagal, magsakripisyo tanganing iboto kan kadaklan kan mga Pilipino si Leni Robredo para Presidente kan Pilipinas.


Para gobernadora, “No way”.


* * *


P.S. Kumbinseron pa an oposisyon na mayong ibang kandidatong magsahong-sahong ki Leni para Presidente tanganing manggana.


Kun si Dato Arroro an malaban para congressman kontra ki LRay Villafuerte sa 2nd district, ibang orolay yan. Sa masunod na column na lang.


Magkasararo pa kaya an Alfelor sa Rinconada?

Abangan…