Dinner-lecture kan foundation anniversary kan Naga ginibo

Sarong dinner-lecture katakod sa ika 437ng Foundation Anniversary  kan ciudad nin Naga an ginibo kan Octobre 15 sa sarong hotel sa ciudad na ini.

An lecture may temang “Revisiting La Ciudad de Nueva Caceres”.  Tampok bilang lecturer si Dr. Danilo M. Gerona, midbid na Bicolano historian.

Mayor na kagpadrino kan dinner-lecture  iyo an Nueva Caceres Heritage Movement, Inc  (NCHMI) sa pamamayo ni Leo Paulo I. Imperial.

Nagin katuwang sa paggibo kan historical event an local na gobyerno kan Naga, Sumaro Bikolnon, Centro Naga Business Club, PhilWiki Community, UAP Camarines Sur Chapter, Center for Partido Studies asin Ateneo de Naga University.

Nag-atendir an mga nasa academe, negosyo, estudiantes asin hubenes, representantes kan local government unit asin mga stakeholders.

An pagtiripon may katuyohan na mapauswag asin maparambong an mga esfuerzos dapit sa pagigin historical center asin heritage destination kan ciudad nin Naga.

Ini saro man na lakdang sa pagprotehir, preservar asin restorasyon kan mga heritage structures asin mga sitios sa Naga asin kataraid na lugar, asin makainisyar kan pag-aram asin apreciar kan istorya asin cultura  kan Bikol sa mga Nagueño asin mga Bikolano.

Arog kan mga naenot nang  lecture ni  Dr. Gerona digdi sa laog kan nacion mismo asin magin sa ibang international na pagtiripon, an saiyang  mga pigheras na impomasyon interesante asin kadaklan digdi nababago sa kaaraman kan mga participantes.

Detalyadong pigsaysay kan historian an makolor asin bibong agi-agi kan ciudad nin Naga mismo asin pagtaraid na lugar kan mga enot na panahon.

Sa parteng question and answer portion pakatapos kan lecture proper ni Gerona, may mga magagayon na idea an nagluwas arog kan katungdan asin agyat sa sarong lider sa tahaw kan marikas na progreso,  na mamantenir an cultura asin heritage kan comunidad.

Si Alkalde Nelson S. Legacion na nagin presente man  nagbuyagyag  kan mga initiativa asin programa kan local government unit kan Naga na gigibohon  pasiring sa pagparambong kan cultura asin heritage digdi.

Kabarale digdi iyo an pag-inventario kan cultural properties, pagconstruir nin historical markers, pagtugdas kan Harong nin Cultura asin paghimo kan Heritage District na pigtagamahan nin awad-awad na fundo..

An dinner-lecture saro sana sa mga actividades na ginibo tanganing magin makahulogan an pagrokyaw kan foundation anniversary kan ciudad nin Naga.