Dios Mabalos po

Nakubhanan ako kan gulping taong nagdalaw sa okasyon kan book launching o pagbongsod kan librong “Ini An Totoo” kan naka-aguing Pebrero 6 aldaw na Domingo alas 3:00 nin hapon sa mahiwason asin magayonon ni Connie/ Ervin Borja Farm sa San Isidro, Magarao Camarines Sur.

Orog nang nabigla ako kan eksaktong alas 3:00 nin hapon nag-abot si Arsobispo Rolando Tria Tirona DD kan Caceres. Ala 1:00 pa lang yaraon na kami na Rudy Baldemor asin Jojo Amador kaiba an miyembros kan sakong pamilya sa venue na pano na nin dekorasyon o palamuti asin karatula kan okasyon. Kuntodo de may mga balloon pa hali sa gilid kan tinampo pasiring sa harong ni Ervin. Pati sa sikuan kan tinampo pasiring sa farmhouse, igwa pa nin direksyon na nagsasabing “Book Launching kan Ini An Totoo sa Borja Farmhouse”.

Saro-saro nang nag-aarabutan an mga bisita, kadaklan mga taga-media kaya an sabi ko saro sanang purong media event ini.

Kaya lang kan yaon na si Mngr. Tirona kaulay na an emcee na si Elmer Abad asin si Kapitan Raul Repane (retired international ship captain), nagpoon nang mag-arabot si tao arog kan mga professionals, doctor, abogado asin mga bisitang hali pa sa Partido asin Rinconada.

Nag-arabot man maski medyo huri na si Ramon Olaṅo Jr. asin Arch. Rommel Alanis kan Sumaro Bikolnon.

Dakul man mga politiko asin kandidato an presente kan okasyon arog ki Tots De Quiros asin Nathan Sergio asin Elaine Parma Orong kaiba an saiyang agom na si Bong, yaon man si publisher Mike Julia kan Weekly Informer asin nag-abot an alamat kan print asin broadcast media na si abogado Henry V. Briguera, may mga kababayan man akong nag-abot apuera ki Kapitan Repane si ex-Vice Mayor Rudy Alivarvar asin konsehal Badong Albo, nasiripan ko man an presensya ni Dra. Mary Jane Guanson Uy asin an saiyang esposo pati nagkakapirang mga doktor asin doktora, may mga miyembros kan Sarong Banggi Organization arog ki Marlet Encillo, Marnie Sagarbarria, Tony Verdadero asin Joel Borja.

Dakulaon na bagay an itinaong kaogmahan ni Eric Dolong alyas “Boy Agta” asin Buddy Esporlas sa saindang mga kanta asin tugtog paka poon sagkod matapos an okasyon. Si Boy Agta palan matibay bako lang on the air kundi pati off the air, baku lang magtaram kundi magkanta. Si Buddy Esporlas famuso sa gitara asin ibang instrumento pati pa pagkanta.

Sinto-porsiento an rayaon kan Tuy-Borja clan na kinababalihan kan duenyo na si Ervin asin Connie Borja.

Sa saiyang mensahe sa publiko, segun ki Arsobispo Tirona dapat perming pighahanap an katotohanan lalo na kan mga taga-media asin mga parasurat sa dyaryo, magazine asin mga parasurat nin libro.

Maski bako siyang Bikolano nabasa na niya palan an ibang porsyon kan libro asin sinabing nagustuhan niya an mga artikulo na haralipot sana alagad dapit sa mga relevante asin napapanahon na isyu asin dapit sa mga tao, saradit o darakula na nagka-orolay niya asin naka-ibanan personalmente.

An Bikol perming piggagamit asin pigtataram nganing manudan an linguahe siring sa saiya.

Pasensya na si dai ko nasambitan ta ako ngani nakasugkod dai ako nakahali-hali sa presidential table kaibanan si Arsobispo asin si bokal Angel Naval. An kantyaw sako ni Atty. Briguera dai ako nakakasuhay sa mga banal.

An sabi ni publisher Nilo P. Aureus, an business manager ko asin bossing sa proyektong ini ta siya an may saderi kan Gold Print na nag-imprinta kan libro kong “Ini An Totoo”, dawa dai na mag-book launching ta pagluwas lang kan libro sa imprinta dakul na tulos an nagbarakal nin kopya arog kan mga judges, fiscal, paratukdo asin mga miyembros kan media.

Alagad an sabi man ni Ervin Borja asin ni Bert de los Martires na mga amigo intimo kaining alang-alang dai man magastos an author o an publisher ta si Ervin voluntad na bubuksan an Farm House, siya an madekorar libre asin siya pa an mapaluto kan mga kakakanon kan mga bisita na merienda y cena.

Bakong suba-suba an gastos kan pamilya Borja pero ogma daa sinda ta dahil kan librong popular na Bikolnon asin kan adbokasiya nin pagbasa, naabala pati an popular na broadcaster sa saiyang kampanya para kagawad sa banwaan nin Tinambac pero mayong tanto sa ngaran nin pagka-aramigo.

Segun ki Nilo Aureus an libro dapat haman na kan bulan pang Hulyo kan sarong taon antes magadan si congressman Louie Villafuerte asin an negosyanteng si Jun Sia asin an sakuyang tugang na si Nerissa. Kundi palibhasa guinibo an book design asin layout sa Manila naapektaran kan pandemya an paghaman kan libro.

Si Vic Nierva ngani an book designer dai naka-abot sa book launching ta yaon nagtatrabaho sa Manila (Thank you Vic). Bako lang si mga nag-aratendir si mga pigpapasalamatan ko kundi si mga nag-greet sa social media hali sa Pilipinas asin abroad, sa cellphone, sa radyo asin personal na nag-congratulate sa sakuya na nagkakasarabatan ko sa tinampo. An iba nag-birisita pa sako kun bako sa Milaor, sa Villa Corazon.

Dakulang bagay an sakong pamilya sa likod kan paghaman kan libro bako lang sa preparasyon kundi pati sa pagventa--- an sakuyang mga aki, mga manugang,tugang asin partidaryos. An sakong maku-apo here and abroad.

Salamat po saindo gabos.

Inspirado na ako na magsurat kan masunod na libro na pig-aapod ni Nilo Aureus na “Book 2” na tibaad may titulong Anti-Climax o Kontra Pelo.