Dipuntong Gobernador, AlcaldeBulaong pinagibohan monumento

Libmanan, Camarines Sur --- Bilang pagtaong onra kan lokal na gobierno kan banwaan na ini maheheling sa retrato an rebulto ni Dipuntong Gobernador asin Alcalde Jose ‘‘Nonoy’’ Bulaong.

Sa FB page ni Alcalde Son Marfil, katuyohan kan pagpatugdok kan saiyang monumento ini maserbing simbulo kan saiyang dedikasyon, serbisyo asin mga kontribusyon sa banwaan nin Libmanan asin provincia nin Camarines Sur na naging gobernador.

Pinasalamatan kan jefe ejecutivo si Art Cantos na naging katuwang nganing marealisar an proyekto.

Sinabi pa sa FB page an proyektong ini komo pagpreserbar sa mga naging lider na nagtaong kasaysayan, paggalang sa mga nagserbi, asin pagpadagos sa progreso kan Libmanan.

Salado an manlaen-laen na mga sektor kan Libmanan sa liderato ni Alcalde Marfil sa pagtaong respeto sa naging lider kan banwaan asin provincia nganing dai malingawan kan jovenes.