DIRUTADO

An ginibong pirilian tigsik ko man

Uminagi na, dapat nang lingawan

Kun dae ka kinamang, napaipitan

May masunod pang election, tiwala lang!

Tigsik ko an satuyang panahon

Kaskas baga, may maabot pang election

Ngonian, nagtitipon na sindang milyon

Mga bobotante liwat babanwiton!

Tigsik ko an nakaagin pirilian

Kun an boto mo saimong pinabakal

Saka isnabon ka kan saimong binotohan

Nuncang maanggot, saro ka bagang palpal!

Tigsik ko an daog na candidato

Duwa sanang rason an pigtatao-

Siya daa dae nagbakal nin boto

O raot an Comelec kaya salto!

Tigsik ko an tiempo kan pirilian

Dae pagdusay an kalag, buhay

Magtadang respeto sa sadiri, isaray

Sa aga may sasapnaon ka pa man!

Tigsik ko an candidatong dirutado

Hapot sa sadiri paorootro

An diskarte saen kaya nagsalto?

Warang pagnamit, hibothibot an sentido!