Divorce Bill sinisikwal ni Diputado Bordado

Camarines Sur 3rd District Congressman Gabriel H. Bordado Jr. liwat kinukontra an pagbuhay kan Absolute Divorce Bill sa ginigibong ‘‘railroading’’ sa Committee on Population and Family Relations sa Camara-Baja kan pag-aprubar kan bill na mayong konsultasyon sa publiko.

Si Bordado antes nanindugan sa congreso nganing kontrahon an absolute divorce bill nagsabi na sa saiyang paglibot-libot sa mga residentes sa barangay asin sa iba pang sektor sa saiyang distrito dakul an nagpapabor na dapat ibasura an pagbuhay kan bill.

Sa administrasyon pa ni dating Presidente Gloria Macapagal-Arroyo ibinasura na an debate sa bill sa presenting administrasyon pig-prubaran man na buhay ni Senador Manny Pacquiao alagad sa ngunian nabuhay na naman.

An Catolico Romano an padagos kan saindang panindugan kontra sa ano man na divorce bill.

Sinabi ni Bordado an divorce bill ngunian na panahon nin pandemya dai napapanahon nganing urulayan sa tahaw kan padagos na paglangkaw kan coronavirus disease yaon pa an homa kan delta variant.

Pigdedenuncia ni Bordado an aksyon kan Committee on Population and Family Relations sa ‘‘railroading’’ kan pagpasar kan substitute on absolute divorce sa nasyon.

An bill kontra buot kan ‘‘Filipino value’’ na mapreserbar an marhay na iribahan kan mag-agom nganing dai man ma-apektaran an saindang mga aki, sabi pa.

Si Deputy Speaker Lito Atienza saro sa nangengenutan nganing ulangon an bill alagad saindang kinokundenar huli kan ‘‘railroading’’ na ginigibo kan komite na saro sa nangengenot si Albay 1st District Congressman Edcel Lagman.

Si Lagman na iyo an padreno kan ‘‘House Bill No. 100 on the enactment of an Absolute Divorce Law’’ nagtutubod na napapanahon nang enmiendahan an ley mantang an Filipinas iyo na sana an nasyon sa kinaban na kontra sa absolute divorce, afuera kan Vatican City state.

Mismo si House Speaker Lord Allan Velasco pabor sa ginibong pag-enmienda sa nagkaperang mga probisyones nganing maging nang ley an ADL. (DPAureus)

Heneral Guillermo Eleazar (sa wala) nagkortesiya sa opisina ni Alcalde Nelson Legacion (sa tahaw) sa City Hall mantang presente si Camarines Sur 3rd District Congressman Gabby Bordado (sa too) (Mike Martinez)