DOH Bicol nagpatanid vs Omicron variant
Pinalibre na kan Department of Health (DOH) Bicol an duwang pasyente sa Omicron variant kan Covid-19 sa Camarines Sur na premiro kuta nang caso kan bagong variant alagad naomayan na.
Kasunod kan enot na kumfirmasyon kan DOH Bicol kan Deciembre 31, 2021 na duwa nang bakunado sa Camarines Sur asin tinamaan kan Omicron variant, na tolos nagkaigwa nin contact tracing nganing malikayan an pag-ulakit sa provincia.
Huli kaini, dapat maging estricto an mga lokal na gobierno sa pagpasunod kan health protocols tanganing maibitaran an paglaila naman sa rehiyon kan bagong variant, sabi pa kan ahencia.
Naikurit kan DOH an caso sa sarong babae na nag-eedad nin 27 anyos taga Bombon, Camarines Sur an nagpositivo sa omicron variant, siya sarong empleado hale sa Manila asin may travel history asin an ika-duwa taga Tigaon, Camarines Sur na empleado nin escuelahan asin mayong travel history.
Dawa narahay na an duwang pasyente sa virus alagad si Director Ernie Vera nagsugo sa mga Municipal Health Officers na maging regular an saindang pag-monitor sa kaparejong caso sa saindang lugar.
An duwang LGUs pig-alerto tolos an saindang mga residentes na dai maging kampante sa saro sanang caso kan bagong variant asin dapat magpaseguro magsunod sa health protocols.
Sinabi pa kan DOH na dai magtiwala an mga Bicolano kun nagparababa an caso kan Covid-19 huli ta dai pa nahahale an homa kan bagong variant maging kan presenteng virus.
Si Vera nag-asegurar sa sarong press conference sa mga Bicolanos na preparado sinda ngunian na taon sa posibleng paglaog kan mga caso ngunian na taon huli kan Omicron variant.
Saiya pang sinabi na an institusyon medikal sa rehiyon Bikol dati nang nag-atubang sa pagparalangkaw kan caso kan Covid-19 kan taon 2020 asin 2021. Sainda nang pigplano encaso magparalangkaw naman an bagong variant asin preparado giraray an mga quarantine asin treatment facilities na dating ginamit kan mga lokal na gobierno.
An Omicron variant marikas na mag-ulakit kumpara sa Delta variant, sabi pa ni Vera.
Sa Ciudad nin Naga, an local IATF digdi nag-andam na kan saindang mga plano laban sa bagong variant mantang an Bombon, haros kataid man sanang banwaan kan ciudad.
Posibleng iimplementar giraray kan City Hall na ipadagos an border control nganing estrictong ma-monitor an nagraralaog sa ciudad alagad depende sa desisyon kan local IATF.