DOH Bicol pinaurog an kampanya laban sa HIV

An Department of Health (DOH) Bicol, pinahiro na an mga hospital kan gobierno na paurogon an advocacia laban sa naglalangkaw nin caso kan human immunodeficiency virus (HIV).

Sa Bicol Medical Center (BMC) sa Ciudad nin Naga sa pinaapod na press conference, sinabi ni Dr. Joey Ranola an jefe kan Epidemiologist Department kan hospital kinakaipuhan dai pa malala an helang magpa-examin na tolos sa laborartoryo sa paagi kan BMC Treatment Hub nganing dai mahulog sa AIDS o Acquired immunodeficiency Syndrome asin sa iba pang treatment hub siring kan City Health Office sa Ciudad nin Naga.

Madaling dakuton kan helang an sarong pasyente asin sa laog nin sarong bulan sagcod sa infected na kan caso alagad an iba dai nakakaaram kan saindang kamugtakan sagcod na lala an helang. An pasyente nagkakaigua na nin kalintura, kulog payo, asin sore throat.

Kun infected na an sarong pasyente nagpapaluya kan saindang immune system na macausa nin iba pang mga kahelangan siring kan tuberculosis, severe bacterial infections, cancer maging meningitis.

Huli kaini, sinabi pa kan BMC kun grabe na an tama dai na kaya kan mga antibiotic na bulong. An solusyon dapat magpa-consulta o examin nin amay sa laboratoryo alagad piglinaw na bako gabos na may helang nin HIV igua nang AIDS.

Sa datos kan ahencia an Ciudad nin Naga saro sa may halangkaw na caso na nagsakat na sa 62 na dagos nang pigdeclara sa category A. sa pinakahuring listahan igua nang 2,553 caso sa Kabikolan kan maikurit ini kan 1984, nagkaigua nin 264 caso kan 2021, nagsakat sa 362 kan 2023 sagcod na naglangkaw ngunian na taon sa 423.

Sinabi man ni Grace Guevara, Chief Medical Technologist kan Naga City Hygiene Clinic Unit nagdadakul na an nagpapa-examin sa sainda sa tahaw kan mga ginigibong advovacia kan gobierno sagcod sa mga barangay na yaon man an grupo kan Barangay Health Workers.

Nakakatabang an advocacia kan DOH sa amay nagpapa-examin sa laboratoryo nganing maaraman tolos an status kan saindang pagduda kun igua tinamaan na kan helang.