DOH, LTO sararo sa advocacia sa road safety

Suportado kan Land Transportation Office (LTO) Bicol an advocacia sa Violence and Injury Prevention Alliance (VIPA) kan Department of Health (DOH) mantang dai man nagrarayo an programa sa kampanya kan LTO sa ‘‘road safety’’ bilang responsibilidad kan lambang sektor sa comunidad.

Ini an padagos man na advocacia kan LTO nganing mapababa an mga nangyayaring road crashes, sabi ni regional director Francisco Ranches Jr.

Kan nakaaging semana si Rances kabale sa mga nagparticipar sa DOH V’s regional launching of the VIPA kan Hunyo 1, 2023 sa Albay Astrodome asin saiyang pigpontohan an kampanya kan ahencia sa road safety asin dapat an mga tsuper bako lang tatao magmanijo envez igwang pagkasabot sa trafico asin aram an dapat gibohon kun igwang problema an saindang pigmamanihong vehiculo.

An tema kan DOH sa saindang piglansar na VIPA ‘‘T.H.I.N.K. before you walk, drive, ride sa Healthy Pilipinas’’ na inatendiran nin manlaen-laen na non-government organizations na kaparejo man sa advocacia kan LTO sa road safety.

Sa Ciudad nin Naga, sinabi ni LTO District Chief Grace Rojas na saindang inaavisohan an mga motorista na dapat kun malaog sa mga centro kan ciudad maging sa banwaan o sa commercial area sunodon an reglamento sa speed limit na 30Kph.

Kun susunodon sana an tamang speed limit lalo na sa nagpapadalagan nin motorsiklo maiibitaran an road crashes, sabi pa kan LTO.

Kaipuhan ta ini gabos bako lang kan LTO. Hagad kan ahencia an 100 porcientong suporta para sa saindang kontribusyon nganing mabawasan an mga aksidente sa trafico.

Sa record kan Bicol Medical Center maging iba pang pribadong hospital kadakle sa mga na-aksidente sa vehiculo iyo an nagpapadalagan nin motorsiklo saka sa mga police blotter kan PNP.

Mientrastanto an PNP Provincial Office sa Camarines Sur sa saindang listahan igwang 1,275 na insidente sa road crashes poon kan Enero hasta Mayo ngunian na taon.