DOH mapatugdok BUCAS, SHC nakatiwangwang

Dai pa ngani operational an pinatugdok na Super Health Center (SHC) kan Department of Health (DOH) sa Ragay, Camarines Sur alagad mapatugdok na naman nin edificio kan Bagong Urgent Care and Ambulatory Service (BUCAS) Center sa banwaan na ini.

Natutuyawan ni Vocal Waren Señar kan premir distrito kan provincia an DOH huli ta nakatiwangwang sana an edificio kan SHC dai man nagagamit. Dai kakayahon kan sadiring annual budget kan LGU Ragay kun maging operational huli ta kaipuhan an dakulang fondo para sa mga sueldo kan doctor, nurses asin iba pang personajes mantang sagcod sa ngunian mayo man ngani nin mga ekipahes siring kan para sa laboratoryo asin dakul pang iba.

An kaparejong edificio kan Super Health Center igua man sa banwaan nin Lupi alagad sagcod sa ngunian nakatiwangwang sana, sabi pa kan vocal.

Sa FB page ni Alcalde Benchie ‘‘BGH’’ Horibata, an proyekto kinumfirmar kan DOH asin opisyales kan Bicol Region General Hospital and Geriatic Medical Center (Bicol Sanitarium) kan sinda magbisita sa opisina kan jefe ejecutivo nganing mag-impormar kan iimplementar na edificio kan BUCAS.

An BUCAS Center mas kumpletong mga gamit kumpara sa Rural Health Clinic. Nagpasalamat an jefe ejecutivo sa iimplementar na proyekto.

Si Congresista Hari Horibata kan premir distrito kan Camarines Sur nagsabi na igua nang fondo na cantidad nin Php10-M para sa phase 1 kan edificio na poponan an patrabajo sa 2026. Saiyang sinabi an proyekto pinahiwas an facilidades para sa x-ray, material and children immunization para sa kaakian, ambulatory care para sa pasyente, diabetes, troma, complete blood counts, blood chem asin ECG testing.

An BUCAS sarong programa kan DOH asin sinda an mamanijar para sa mga outpatient asin serbisyo sa mga pobreng familia.