DOH mapatugdok Children and Women Hospital sa CSur

An Department of Health (DOH) mabugtak nin bagong hospital sa Camarines Sur alagad ngangaranan na Children and Women Hospital na itutugdok sa barangay Del Rosario, Pamplona, Camarines Sur sakop kan 2nd congressional district.


Piglinaw ni Vokal Romulo Hernandez kan segundo distrito bako exclusibo sa mga aki asin babaeng pasyente envez para sa gabos mantang sa pangaran sanang ‘‘children ang women’’ alagad magaako man giraray dawa lalaking pasyente.


An proyekto hinagad ni 2nd district Congressman LRay Villafuerte sa gobierno nasyonal.


Saro sa mga kondisyon kan DOH dapat igwang lote an provincia nganing tugdukan kan hospital.


Nakakua na an Capitolio nin sarong hektarya o diez mil metros cuadrado lote na pigdonar sa provincia alagad dai naman nginaranan asin kataid sana kan district office kan Land Transportation Office sa barangay Del Rosario.


An gabos na miembros kan junta dawa si yaon sa oposisyon an nagpabor nganing marealisar an sinambit na proyekto.


Padagos na an pagkumpleto kan mga rekisitos kan DOH mantang igwa nang alokasyon an gobierno nasyonal para sa konstruksyon kan edificio, sabi pa ni Hernandez.


Hinahalat na sana an pagkumpleto kan mga documentos asin rekisitos kan ahencia mantang dai pa makatao nin exaktong bulan kun nuarin mapuon an konstruksyon.


Kun marealisar an dagdag na hospital sa Camarines Sur makakabawas sa ginatos na pasyente dinadara sa Bicol Medical Center (BMC).


An mga pasyente na hale sa premir asin segundo distrito kan Camarines Sur harani na an lugar nganing dai na magdalagan sa Ciudad nin Naga. (dpa)